【獨媒報導】升中派位昨日放榜，三名油麻地天主教小學（海泓道）小六學生接受傳媒訪問，片段成為網上熱話。油蔴地天主教小學（海泓道）校長陳淑儀表示，學生在受訪前沒有「受訓練」，指對方的成績原本未達Band 1，在短期內憑着努力成功考入名校，「佢講嘅係事實嚟」，又笑言另外兩名學生的表情很可愛。
受訪的陳同學獲派入九龍華仁書院，他接受記者訪問時稱：「報咗補習班，由星期一到星期五，一放學就即刻去啦。咁我都覺得，其實我自己付出咗咁多，有呢個回報都係值得嘅。」在鏡頭前左邊的同學顯得愕然，並與右邊的另一名同學對望而笑。
Now 新聞截圖
記者問到：「呢個過程休息夠唔夠㗎？」陳同學稱「夠」。記者再追問：「會唔會好辛苦但係？」陳同學就表示：「如果講辛苦就真係覺得談唔上，因為我覺得，讀書係我嘅本份嚟㗎嘛。」在鏡頭前左邊的同學再次顯得驚訝及「O嘴」，右邊的同學則微笑。在陳同學身後的兩名同學，分別獲派入皇仁書院、英皇書院。
Now 新聞截圖
油蔴地天主教小學（海泓道）校長陳淑儀今早在商台節目稱，「本身三個好好關係，三個都係叻仔」。她表示，擔心社交平台的言論令同學不開心，稱與老師留意到有網民指，陳同學的受訪內容「好受訓練講」：「呢樣嘢係無嘅，因為採訪嘅時候，我哋一向都唔干擾學生講咩內容，我哋亦唔知道記者會同學生講乜嘢，不過事先係家長同意咗接受訪問。」
在節目中，陳淑儀承認教育、社會要求已與昔日有所不同，現時學生的說話技巧訓練亦較以往多：「大家不用太驚訝，有啲小朋友講嘢，佢真係表達得到。」
陳淑儀（資料圖片）
對於陳同學，陳淑儀指對方原為未達Band 1 成績的學生，在短期內憑着努力發奮圖強，「佢講嘅係事實嚟」：「我哋問過佢，佢話真係㗎。佢都覺得係一個目標，佢真真正正覺得係要咁做。」
陳淑儀大讚三名學生都很可愛，曾向其中兩名學生了解：「好可愛嗰位呢，佢純粹係『咁辛苦？』佢哋雖然熟，佢大家唔會講我讀書點樣安排，平時小朋友唔會講呢啲。佢係無聽過，原來呢位同學每日放學去補習，係真係驚訝，好辛苦喎、好犀利。另外嗰個同學純粹⋯⋯咦，點解你做咗個表情，人哋做緊訪問。」
對於片段成為網上熱話，校長就強調，學校必須要保護學生，並透露今早曾向三名學生了解，但他們均表示「好okay喎」。