同香港人講玉器，好多人會知油麻地有個玉器市場；但同油麻地人講玉器，除咗玉器市場之外，可能大家已經講唔到啲乜。當我哋接到「香港九龍玉器工商聯會」嘅訪問邀請時，實在估佢唔到，主席話想同大家傾吓偈，畀人認識玉器街？好，就聽吓你講乜！
首先估唔到嘅係，大名鼎鼎嘅「香港九龍玉器工商聯會主席」，竟然係一個官仔骨骨、大大隻隻嘅青年才俊，小記非常好奇，年幾輕輕嘅佢究竟點會係主席呢？
「可以話係家族生意，細細個就喺寶號幫手，中學嗰陣已經會送貨點貨，畢業之後，做咗幾年嘢，就全職返嚟幫手。啲叔叔伯伯由細睇到我大，又想畀後生一輩接棒，我又好想消除一般人對玉器業嘅誤解同偏見，想人知戴玉器都可以好年輕好潮，噉就做咗主席推廣吓。」
誤解？偏見？我都識朋友話買玉器好似被啲師傅呃，自己又唔識分好壞，變咗店家講乜就乜噉，買完一次就無下次喎。
「要分玉石靚唔靚，可以睇雕工、花紋色澤、層次深淺，靚玉啲花紋會好似食咗入嚿石噉，喺入面散出嚟，玉石紋亦會有好幾層。但其實玉石有平有貴，有愛嘅話，又唔一定要買到好貴。唔鍾意嘅話，人哋講到天花龍鳳都無用嘅。而且平又唔代表差，貴亦都唔一定代表好嘅。」
「的確我見過有人魚目混珠，平嘢當貴嘢賣。而且以前好多人買賣，係有可能遇到人唔太老實。但我就有個原則，一定要對得住良心，賣出去嘅玉要物有所值。正因為噉，就更想教識大家分辨，就唔驚蝕底。何況又唔一定係被人老點，有時嚿玉係靚，但有啲師傅未必太善於表達，解說得唔夠詳細，個客先會覺得唔舒服啫。」
OK，算你過關。但而家後生仔戴條手繩都嫌MK啦，你又點叫人陀玉呀？
「玉石又唔一定要陀，其實仲有好多穿戴方式，吊墮、手額、頸鏈、雕塑、小飾物，樣樣都好靚。而且玉石可以保平安，亦象徵住氣派，每塊玉都有價值喺裏面。年輕人鍾意冒險，玉正可以保護佢哋，噉都好夾吖。」
「玉器街同以前比有好大唔同，每間舖頭嘅門面擺設、玻璃窗裝飾都加入咗好多年輕人鍾意嘅飾品。，大家真係可以嚟行一行。我諗唔單止因為自己喺玉器行業長大，先想佢繼續發展，亦因為佢係香港傳統行業，我好希望屬於香港嘅本土文化唔會消失。」