昨晚大家都大談Viu的Chill Club總選表演有幾精彩，這個當然會另文再寫，反而大台派出與內地合辦獲林鄭認證聲稱主打港樂的歌唱節目，無乜人提，唔緊要，重點係：咦？仲唱番廿幾三十年前嘅歌呀喂。
然後可能再留意一下：大台近年最成功「音樂節目」叫流行經典五十路年，唱舊歌唱舊歌唱舊歌，無論原唱藝員所謂新一代歌手都係唱舊歌；大台選秀節目參賽者都係唱舊歌，係愛情陷阱杜麗莎假如果隻舊歌，連十五歲樓下所謂小星夢參賽者都唱呢Ｄ，典解呢？
不如先唔講政治取態，其實，自從2009年，大台同四大唱片公司因為版稅問題反檯，變成只有星夢、英皇與及小數唱片公司歌手先會出現嘅電視台，發現唔掂再推班藝員唱歌，然後後來話放生喇（好大的官威）俾其他歌手上去不過又無得參加勁歌總選，呢咁多年以來金曲金獎係乜歌呢？
2008 謝安琪 囍帖街
2009 容祖兒 搜神記
2010 衛蘭/JW 男人信什麼
2011 林峰 Chok
2012 王菀之 留白
2013 容祖兒 天窗
2014 吳若希 越難越愛
2015 吳若希 眼淚的秘密
2016 李克勤 一個都不能少
2017 李克勤 失魂記
2018 張敬軒 百年樹木
2019 周柏豪 讓愛高飛
2020 莫文蔚 呼吸有害
其餘每年總選歌曲更精彩，其實係大台電視劇主題曲回顧加星夢唱片有限公司春茗。雖然每次頒獎禮不斷強調「實至名歸」，不過究竟呢堆歌有幾大熱，好主觀呀可，但其實若果真係咁大熱，你估，大台會唔會叫班比賽參賽者係咁唱呢十幾年來嘅作品呢？
又公平少少講：睇番第一季全民造星，參賽者選唱廣東歌唔多，極其量都係陳奕迅陳柏宇（不過呢兩個又係四大唱片公司），到之後呢，廣東樂壇真正復蘇，你睇第四季造星，幾多參賽者唱廣東歌就明白。
咁大台一手一腳造成自己近十年電視台世界廣東歌樂壇咁「百花齊放」，若果真係大受歡迎當然好巴閉啦，不過實際情況，佢地都非常心知肚明。
所以，當星夢傳奇出左一批新歌手，無論點大台都希望佢地盡快紅盡快有新作品，然後希望可以令後生一輩會喜歡，再慢慢儲歌；當然，大台亦唔係主力本地市場，所以尋晚果個歌唱節目，係呀，捧新人係唯一目標，希望一個唔覺意「火紅」左（係咁講架嘛）可以紅番上去就能夠搵真銀。
點解要咁呢？未出現呢批所講新歌手，大台將自己塘水滾塘魚嘅星夢歌手及藝員同樣推佢地北上參與內地節目，若果係受歡迎又能夠帶來經濟效益，當然好啦，只不過現實係可能人地都唔多想睇你（就正如大台劇成日話想打返上內地市場而實質唔多成功），咁真係愁架播。
好喇，十年空窗期，玩死自己無歌手無歌，然後香港音樂市場近幾年大爆發，唔好懶大方話歡迎其他台歌手上佢地節目，而係人地都唔多恨上。
四大唱片公司破冰之後，有冇唱片公司會簽死大台唔去Viu？佢地極其量俾下面上下你節目唱歌，但佢地都知，要真正打入後生仔市場，真係唔駛旨意大台幫到你。
依家就尷尬喇：你又話想造好音樂節目，但又無歌手無歌（或者有，人地都唔多想理你），咁你可以點攪？所以勁歌金曲由開頭係威係勢一粒鐘，變番十五分鐘，不過最緊要有廣東樂壇至強Eric Kwok！大台知道咁唔係辦法，所以決定將頒獎禮同官台合辦，希望可以到時有班唔肯上大台嘅歌手出現。
人算不如天算，雖然都唔會期望果個頒獎典禮會好睇（當初睇候選名單已經十萬個爆趣），但又遇上第五波，要延期到七月。只不過，佢地合作嘅官台，有一份長過十幾人嘅唔講大家都知禁播名單，大台呢個如意算盤，注定失敗。
所以，大台剩低就係廿幾年前果堆金曲，與及廿幾年前已經有知名度想搵快錢果堆歌手。其實繼續流行經典五十咩先至係大台目標觀眾至愛，而尋晚果個節目，只係一個配合回歸廿五周年主旋律嘅怪胎：港樂又好乜都好，唱番廿幾年前先至岩國內人收睇，然後想搵錢果堆經典歌手理得你要唱乜嗟，剩低就係目標想捧與及唱片公司希望佢打入內地市場果個爆炸頭。
呢個節目根本無乜野遠大理想推動香港音樂，亦唔係要令某一班觀眾鍾意睇，你地諗多咗喇。
原文刊於作者網誌
（本網歡迎各界投稿，文章內容為作者個人意見，並不代表本網立場。）