文／男班長
佐敦道碼頭——曾經係九龍區最大嘅交通總滙，但唔好被「碼頭」個名誤導，佢同時都係九巴同紅Van總站。如果唔係親眼見親耳聽，只靠Google描述，係絕對體會唔到呢座地標嘅繁忙盛世。日頭，碼頭車水馬龍，人人爭住趕船趕巴士，急速嘅步伐，仿佛就係九十年代初香港起飛嘅步伐；嚟到夜晚，人流散去，人情依舊，一幕幕人生百態，就等老街坊慢慢講你知……
碼頭嘅一大特色，係有來往中環嘅汽車渡輪服務。一九七二年之前，紅隧未起好，九龍半島同香港島嘅車輛交通，就係由佢去撐起。一大片畀汽車排隊等過海嘅空地，去到夜晚，搖身一變，就變成街坊嘅地盤。
每晚食完飯，碼頭就係左鄰右里聚腳嘅好去處。細路總係霸得最多地方，捉伊因，跳飛機，踢波，大人就圍埋傾計，各有各精彩。嗰陣社會風氣好純樸，無乜童黨爭拗，係間唔時會有一兩班打扮奇特，三五成群嘅青年喺暗角叫囂，或者捧住一個黑黑長長，大大嚿嚿嘅座枱收音錄音機，大播譚詠麟同張國榮嘅歌。老實講，真係好好氣氛，場面一片和諧。
唔少得嘅，仲有一車二車流動小販檔。到時到候，木頭車就會出現喺空地，畀我哋食宵夜。嗰個年代嘅街坊生意，都不太講啲咩真材實料，而街坊都係志在有嘢落下肚，有地方竭腳傾吓計，買嘅係腸粉、沙爹魚蛋、嗱渣面、碗仔翅……食嘅係人情味。而家諗返，先識得敬佩幾位叔叔阿姨，做足十幾個鐘，日曬雨淋，日頭服務完過海客，夜晚就招呼老街坊。
有一排重流行過BMX單車，嗰班「打扮奇特，三五成群」嘅後生仔，突然升呢做咗單車黨，將錄音機綁喺車尾，四圍抽頭飛車。嗰時我仲細，但係見到哥哥姐姐踩住兩個轆，喺佢哋中間左右穿插，搞到我鬼死咁羡慕——估唔到阿媽一早留心，有日買咗架幾睇得吓嘅單車返嚟（有輔助轆），我開心到即刻推佢出去，揸我人生第一部離地私家車。
但爽咗五分鐘就出事……
頭搖又尾擺係威係勢之際，忽然清風吹送，有架「兩個轆」飄過眼前，一望竟然係氣質、大眼、長髮、（似）混血、靈氣女班長（錯重點）。我都幾肯定佢無心喺我面前耀武揚威，因為我從來唔係佢視線水平（又錯重點）……當時碼頭突然缺氧，被厚厚嘅羞恥感籠罩，因住年齡、性別、身份嘅差距，我就噉窒息。五秒醒返後，我一仆一碌踩住架「四個轆」同呀媽講︰
「我要拆輔助轆！」
「黐線o架咩你？」
「我要拆轆呀！我唔理，我要拆轆呀！」
呀媽見我咁硬頸，請人將嗰兩個唔光彩嘅輔助轆拆咗（大少爺總係亂咁嘥錢）。嗰一剎那，我就學識踩單車。
佐敦道碼頭，共我有過最美的邂逅。