【獨媒報導】《給十九歲的我》今日起暫停公映，導演張婉婷昨日（5日）「尾場謝票」後，在記者室回應記者提問。被問到會否對暫停放映感到可惜，她稱「真係好奇幻嘅旅程，即就真係似愛麗絲夢遊仙境囉」，遇到「各式各樣你未見過嘅嘢」，指認為「人生在世有咁嘅經歷」「豐富自己嘅人生」，令自己更堅強。

問：（對《給十九歲的我》引起的爭議）有何回應？

答：已看了報道，會個別跟他們傾，了解阿聆，主要抗拒公開放映。我們今日想過，都是解決她的心結先，所以暫停了公開放映。

我覺得可能大家溝通上有落差，我在他們F5、F6時，知道有戲院有興趣，幫我們放這齣戲。之前不知道，不知拍了甚麼出來。到他們F5、F6時，跟他們大圍咁傾，好開心咁報告，好囉有得在戲院放映，阿聆都在場。其中有一位同學說，不鍾意在戲院放給觀眾看，就話我不拍了，中止拍攝。我記得阿聆仲有話畀佢聽，我地簽了Consent，我的理解，是佢勸呢個女仔，但呢個女仔好堅決不拍。無所謂的，我們不會監啲女仔拍。中途都有好多人離開。個次之後，我以為留下的女仔對公開放映應該都是OK的，可能我們對呢樣野理解有落差。套戲（放映）完了後，佢話希望只做包場、電影節都得。

問：由個刻開始，由慈善用途，改了公映為目標？

答：其實一開始的consent都有寫埋，會在戲院放。好似我同觀眾講，範圍寫到好闊，大家可以自由度高啲。一開始已經有，2011年已經寫了，當然是未知之數，寫咗先，理想就是拍得好到可以畀普羅大眾看到。

問：公映前，有沒有拿了同意？跟了他們說？

答：其實一開始個個都知道，聆在F5、F6，已經話左佢聽，後來佢覺得可以包場、電影節。學校都沒有勉強，所以一直都是包場，因為這些場數的反應好好，沒有負評，起碼對啲女仔無，啲人話佢地可愛、勇敢、肯同人分享佢地的故事。學校都無負評，覺得理想達到，有安全感，覺得時機到，就去做公映。

問：女仔覺得涉及私隱，不會想完全公開畀大眾知道？

答：我們都有問過，有咩部分係覺得不可以，有些人講了畀我聽，我都盡量幫她改。阿聆，我有問過有幾個點邊度，但佢無同我講落去，咁我無勉強。可能、應該多啲時間研討，或者佢的期望和我的期望不對稱，所以就是話停下來大家再研究。

問：為何不讓女生先看Final Cut？

答：在內部籌款時，未公映前，在2021年12月，到2022年8月，中間有八個月，斷斷續續研討，老師幫他們溝通，看下佢地有咩地方唔舒服，有咩唔舒服可以話畀我聽，我咪盡量改。

問：即是同學看的不是Final Cut？

答：個個唔係，個個係差唔多Final Cut，不過真係唔得我地先再改，個個不是死物，如果真係唔可以，都可繼續修一下。

問：阿聆是否受情緒困擾？有沒有了解她的情況？

答：我不知道她受情緒困擾。

問：有哪些位真的聽到意見後改了？

答：好似阿佘有一處，其實很少的，說了國語，佢要改返廣東話。咁咪配返廣東話。其餘無咩人提出話改咩嘢。

阿聆可能有意見，問了，我寫了提議給她，但佢無回覆我。後來和學校商量過，既然無回覆就我們照去先啦。

問：有沒有相關的紀錄可以看？

答：Whatsapp。

問：即是有Whatsapp記錄？

答：有的，有的。

問：你的心情如何？

答：我其實未有時間思考，整天都在東奔西跑，但我今晚見到那麼多人滿座，第一行的側邊位都有人坐，今晚元宵節還有那麼多人來，我很欣慰。因為還有很多觀眾支持，沒緊要的，再放不放映下去，對學校話我而言，都是人比電影重要，但它曾經有那麼多人來看同支持，我已經很滿足。

問：如何看坊間評價大轉折？

答：我也很奇怪，一開始完全沒有負評，突然在這幾天，即這個星期內，突然我們宣布要公映，在感恩會後就一連串事情發生，我也措手不及。這些外間評論，作為一個導演很難說安排或如何提防，不過事情就是急轉直下，但你知道世界發生的所有事都不如願的，我拍了那麼久電影就知，就像電影中說，所有這些事都是永恆的一個片段而已。上個月（評價）還是好好的，突然一星期，變了第二個調子，但也不用灰心的，作品是否成立，或別人會否記得，是視乎作品的，不是其餘的事。

問：對暫停放映會否感到可惜？

答：其實我會咁諗喎，真係好奇幻嘅旅程，即就真係似愛麗絲夢遊仙境囉。一頭跌咗落個洞入面，就發現好多奇怪嘅動物、各式各樣你未見過嘅嘢，咁呢個紀錄片都係非常之獨特……最近急轉直下，然後暫停公映，我覺得……我是未試過。我覺得人生在世有咁嘅經歷，即豐富自己嘅人生，即令自己更加堅強啦，如果我可以繼續努力，秉持自己嘅信念，我就要繼續堅強啲。

問：有咩想同受訪者說？

答：我在此，很感謝同我一齊工作十年的製作公司、工作人員，同埋所有女仔、同學，個幾位主角，所有師生、同埋舊生，好努力寫逐字稿。管弦樂團、指揮，所有貢獻這戲的人，十年內不計成本，令我覺得電影界不是功利的地方。只是想幫手完成一個有意義的工作，而不是為了賺錢。我好想回報他們，但暫時只能說聲對唔住先。