研究社差唔多隔日就有大小研究發布，屈指一數，2024年頭10個月就有150份研究產出，包括2份大型報告、90篇研究文章同58條Podcast／Reels。
呢啲產出背後，當然多得唔少一眾助研者義工同研究員幫手，從開brainstorm 會研究題目構思、整理數據、外出考察、驗證資料、撰寫文章／拍攝錄製、製圖等等，少啲功夫都唔得。
不過，每個做過研究嘅朋友都會明白，研究係唔必然「包生仔」，有時「死亡率」可以好高的。研究員整理咗過去約半年研究到半路，發現「此路不通」落入dead end，要忍痛放棄嘅研究題目，或遇上困難而需要重新定位嘅研究題目，數落都有幾十個，包括：
＊樓盤偽裝地理學－－全港各區樓盤透過掩飾自己真正地理位置來提高價值？
＊書展參展商歷年來源地比較分析－－近年書展參展商來源是否趨向單一？
＊漁護署禁止斬樹警告牌位置及數字整理－－側面探視鄉郊非法破壞情況
這些研究點子，本身是出自研究員／助研者對新近社會議題的覺察，但有時經過資料搜集後，發現結果並非符合當初預想的假設（例如書展參展商的研究）；有些則是研究資源不足，無法進行（例如全港性的樓盤偽裝地理學，最後只能完成深水埗區【註1】）；有些則是很需要政府不願提供準確資料而無法繼續進行（例如禁止斬樹警告牌的確實位置能代表何處被非法斬樹，但豎立警告牌的漁護署「無法」提供資料）。
換句話說，係隔日一份大小研究產出背後，牽涉咗研究員同助研者義工嘅更多嘅心血，而公眾係未必見到的。不過，呢個係研究必經之路，研究工作進入dead end 不代表失敗，更可能是一種收穫，例如認知到當初的假設未必正確，研究過程對議題有更深入的認識，亦有助研究員在將來炮製更對應問題的研究題目，或能啟發了其他的研究題目，資料亦可以用於同一主題的另外一些研究題目中，所以並非白費心機。
研究，其實都係一個走向未知嘅過程，究竟發掘完後，係咪真係可以為公共討論嘅一啲盲點，打開一個缺口，又或者可以提供到一個另類視角，予公眾去檢視現時嘅一啲社會現況，喺研究到某個深度之前係不可知的，但呢啲或許就係從事研究嘅有趣之處，亦吸引到一眾來自唔同界別嘅朋友，同我哋一齊去挖料砌料，一齊去嘗試。
May 曾經花過心機的研究項目 RIP.
【註1】本研社：【別有用深】樓盤偽裝學：新盤最棹忌起喺深水埗？
（本網歡迎各界投稿，文章內容為作者個人意見，並不代表本網立場。）