（獨媒報導）城規會周四（6月29日）舉行最後一場粉嶺高爾夫球場發展計劃公聽會，會議延至凌晨才結束。龍躍頭村長、前民建聯北區區議員鄧根年身穿北區區議會外套出席，反對政府收地。他表示高球場建屋影響明朝鄧氏祖墳的風水，或會影響鄧氏全族人的生命。鄧根年又稱，若政府一直一意孤行，村民將繼續以不合作態度抵抗。
政府將於9月1日收回粉嶺高爾夫球場粉錦公路以東的32公頃用地8個球洞，其中東北面9公頃3個球洞計劃興建公營房屋，其餘23公頃5個球洞則交予康文署管理，作保育及康樂用途。城規會6月舉行5場公聽會，周四（6月29日）舉行最後一場，聽取公眾和團體的申述和意見，當日粉嶺和上水的鄉事派代表佔用大部分申述時間。
相關報導：
鄉事派動員撐高球場 有村長斥建屋由朱凱廸提出、接納建議官員「戇Q」
盛智文：高球場起樓如填平維港或在海洋公園建屋
侯志強：收高球場如剁人手 不會死但殘廢
鄉委會主席建議搬粉嶺高球場至沙頭角：我大把地方
粉嶺高球會稱收到沙特阿美比賽時間表 會長：能否成事屬主辦方決定
龍躍頭村長、前區議員鄧根年身穿北區區議會外套出席申述
在最後一場公聽會上，除了三位北區區議員，即上水區鄉事委員會主席侯志強、沙頭角鄉事會委員會主席李冠洪，以及金錢村村長侯福達出席申述外，還包括了上水和粉嶺各村落的村代表，例如古洞、蕉徑、料壆、松柏塱等。
粉嶺龍躍頭村長鄧根年聯同一眾粉嶺居民出席公聽會。鄧根年為前民建聯北區區議員，2019年區議會選舉敗給北區區議會主席羅庭德。已經不再是區議員的他，卻身穿印有北區區議會標誌和字眼的綠白色外套出席，並在會上向城規會委員舉牌反對建屋，是5場公聽會中唯一一個在會上舉牌的申述人。
指建屋影響風水
鄧根年表示堅決反對政府收回粉嶺高爾夫球場，稱政府收回的23公頃作保育及康樂用途的土地範圍中，有一個明朝鄧氏祖墳，「係460年前，喺明代，係我太公墳嚟嘅。」
他表示每年農曆九月初十的秋祭，龍躍頭子孫約兩百至三百人均到祖墳拜祭祖先，「每年都要去拜，係慎終追遠，係尊重我哋啲太公、老人家，因為無我哋嘅太公、老人家，就無我哋今代嘅存在。」
鄧根年續指，鄧氏一直對高球會管理高爾夫球場有信心，高球會沒有破壞風水，完整保存祖墳，「我哋亦都秉承優良傳統習俗，對呢個（高球會管理球場）環境、風水學等等好信任，祈求太公一路喺度保存完整，保佑我哋啲子孫喺度繁衍同埋身體健康，陸陸續續咁樣喺度生活。」
鄧根年指，在鄧氏祖墳前的9公頃興建公屋，將影響鄧氏祖墳風水，龍躍頭2,000多名村民表示反對，「如果我無記錯，就係喺我哋祖墳面前，起五六座40多層高嘅大廈，呢方面係嚴重咁影響到我哋祖墳嘅風水問題，（我）係代表我哋兩千幾嘅村民表示強烈反對。」
鄧根年
稱「新界人」不顧性命抵抗英國日本入侵
鄧根年聲明，「新界人」一直愛國愛港愛家鄉，並一直支持政府，曾不顧性命抵抗英國人和日本人入侵，希望城規會委員備悉考慮相關歷史：「鄉下人、新界人，一路都係愛國愛港、愛我哋家鄉，無論點樣戰亂、好麻煩嘅時間，我哋都係企係正義同埋政府嗰邊嘅，包括百幾年前英國人蝦我哋，七八十年前日本仔嚟打我哋嗰啲，我哋新界人組織嗰啲義工、小鬼隊、游擊隊，同佢死過，命都唔要，都係咁樣去……希望呢方面各位專業人士都認真考慮。」
批政府與村民「搞對抗」
鄧根年指政府有不少高球場以外的替代建屋方案，「喺呢個高爾夫球場旁邊嘅丙崗村、蕉徑村、坑頭，甚至古洞北都有好多地方容易收、影響居民少嘅，而政府都無咁做」、「無地方起屋嘅，我鄧某人收聲我唔講，但唔係吖嘛。」
鄧根年又批評，政府不發展大嶼山和郊野公園邊陲，卻發展高球場，是與龍躍頭村民「搞對抗」：「大嶼山成個地方差唔多任你用嘅，你哋都唔去用；我哋北區仲有好多郊野公園邊皮，仲有好多地方可以畀有關部門發展，但你哋偏偏都唔做，係要同啲村民搞對抗，我好唔鍾意。」
或影響鄧氏全族生命
他又指球場建屋影響祖墳風水，或會影響鄧氏全族人的生命：「我太公個山墳如果有咩事，影響到我哋全族人，有兩千幾村民喺龍躍頭，我哋嗰啲村落都差唔多六百幾七百年㗎喇，擔心到有啲生命影響或者風水問題。」
鄧根年認為球場建屋後，政府官員或已退出政壇，鄧氏全族卻受到影響而「脫唔甩」：「你話你哋照做唔緊要，你啲高官吖嘛，你就可以遲遲下唔做，做第二樣嘢，但我哋係脫唔甩㗎，我哋呢個慎終追遠、尊師重道，優良嘅傳統，同埋風水係堅持落去，希望你哋發展之前認真考慮我哋鄉下人嘅意見。我哋村今年年尾，每十年一次打醮，打醮都係優良傳統。」
他續指香港因有民主制度，人們才能發聲、才會喜愛，但政府堅持收地，是官僚主義的體現：「我哋有咁多好嘅意見，係雙贏、三贏畀大家，都唔考慮，嗰啲叫做官僚主義，你話事咁，咁不如唔好開呢啲會啦，將個制度改咗佢啦……香港得以咁多人鍾意，好愛呢個地方嘅，就係因為一個民主嘅制度，係可以畀我哋發聲，將唔啱嘅嘢講出嚟。」
資料圖片
鄧根年：政府若繼續一意孤行 村民將繼續抵抗
鄧根年表示，若政府一直一意孤行建屋，龍躍頭村民將繼續抵抗：「我哋一班村民係有感而發，如果你哋都係一意孤行唔聽嘢嘅，咁我冇辦法，我哋唯有照樣一個唔合作嘅態度去抵抗。」
在委員問答環節上，城規會委員、香港女律師協會前會長黃幸怡追問龍躍頭鄧氏祖墳風水。規劃署粉嶺、上水及元朗東規劃專員陸國安表示，祖墳位置大概位於規劃署實地照片第8個觀景點，屬保育及康樂用途的區域二，面向北面。翻查文件，從角度和地圖可見，祖墳與區域一的擬建公屋發展範圍接壤，亦正正面向區域一。