（獨媒報導）復活節長假期完結，有飲食界人士表示期間生意慘淡。稻苗飲食專業學會榮譽會長邱金榮在電台指業界生意較過往大跌兩至三成，慨嘆跌幅非常犀利。邱形容「飲食業望啲人入嚟」：「成間鋪係吉嘅，可能得一兩檯客，其實好徬徨。」他希望政府能「做啲嘢」，推出晚間或假期消費券，刺激消費協助業界紓困。
在新冠疫情前，港人在假期同會到外地旅遊，包括北上消費。被問到今年對本港飲食業是否有較大影響，邱金榮今早在商台節目表示「絕對係」：「離開呢一班人都係啲消費群，離開咗香港，留返啲消費力好弱⋯⋯」
指北上影響消費信心 料未來一星期市道較淡靜
北上消費已成為不少港人習慣，邱金榮憂慮會影響消費信心：「大家都覺得經濟唔好，上去消費，個氛圍令到啲人都係咁諗，咁樣先係最擔心。」他指市民在北上消費後，預計未來一星期市道較淡靜：「佢要洗嘅錢都洗咗囉，佢一定慳慳哋，揀啲平嘢食呀，或者返屋企食、自己煮呀，呢啲情況都真係對我哋業界影響都好大。」
另外，有網民在社交網站，成立「全港店舖執笠結業消息關注組」，逾18.9萬人加入，當中可見不少食肆倒閉。對比過往復活節假期同期，邱金榮亦指飲食業生意大跌：「我哋覺得假期應該係好旺㗎嘛，我哋應該真係搵錢㗎嘛。」
倡業界與政府一人一半分擔消費券 盡量令市民留港消費
至於有何解決方法，邱金榮認為只能自救，指業界已出盡法寶，包括推出不同優惠。不過，他期望政府能「做啲嘢」：「政府應該係諗一啲，我哋之前都提倡，會唔會例如派一啲假期消費券，或者夜晚消費券幫吓業界。」 邱金榮認為，業界可與政府一人一半分擔消費券：「盡量睇吓做啲嘢，令到市民留返喺香港消費。」
主持就質疑消費券治標不治本， 邱金榮無奈稱「都要做啲嘢囉」，而金額則要視乎政府想法。他指消費券可以限定在指定時間或日期使用，例如晚上或假期：「起碼有啲吸引力囉，政府亦都做啲大型嘅活動，吸引遊客過嚟香港，多方面去做對我哋業界幫助大啲。」
邱金榮慨嘆，業界在本港與內地通關後，在生意下跌時已意識到市民消費習慣改變，「用盡晒方法去諗」，指加上百份百貸款擔保進入還錢期，有部份企業或未能周轉，需要「拉閘」倒閉。
指香港已失優勢 預計今年十分難捱
邱金榮又分析稱，市民認為北上消費平、靚及有服務：「各方面都好似係優勝過香港好多。而香港好多優勢，我覺得好似係冇咗一樣⋯⋯對香港嚟講，宜家真係⋯⋯大家要諗一諗方法，點樣能夠保住香港呢個美食之都。」
他預計飲食業今年將十分難捱，歸咎由於人手不足，變相成本上漲，而且生意欠佳、無法加價，導致惡性循環，個人又認為垃圾徵費應延期推行。