【獨媒報導】立法會大會今日討論《施政報告》致謝議案，議員繼續替政府谷針「獻計」，選委會界別陳凱欣就稱有「突破想法」，參考雪榚車做法，在流動疫苗車播音樂吸引小朋友打針。陳凱欣甚至建議將戲院改為「注射室」，打完針向小孩贈送爆谷，她稱：「呢個經歷一路令小朋友以後都唔會怕打針，分分鐘更加愛上打針㖭！」
十多名議員的發言都觸及提升接種率，飲食界張宇人提議強制全民打針，九龍中楊永杰就建議外展隊替露宿者打針。
陳凱欣就稱有「突破想法」，她指政府現時只得兩架流動打針車，可以改裝旅遊巴在不同區谷針，稱可能很多市民「仲係十五十六，但當見到疫苗車泊咗喺你屋企附近，可能你就會即刻諗打」。
市民如何知附近有打車？陳凱欣自問自答，建議參考雪榚車做法，「播一啲音樂，一聽到就知道疫苗車」，又指當小朋友聽到音樂，「都會放鬆啲，唔洗咁驚去打針」。
送爆谷送米 「分分鐘更加愛上打針」
有議員建議將受停課影響的學校改為疫苗中心，陳凱欣更進一步，稱自己有「再突破、大膽」的建議，將戲院不同影院改為注射室，「戲院夠大，啲凳又夠舒服，打完就休息20分鐘」，離開時更可以贈送爆谷予小朋友：「我有信心呢個經歷一路令小朋友以後都唔會怕打針，分分鐘更加愛上打針㖭！」若果是長者，她稱可以送米和送罐頭。
管浩鳴建議港人北上治療
另外香港治療設施不勝負荷，確診者目前只能在家苦等送院，但即使送院亦未必有病房，分分鐘餐風飲露。選委會界管浩鳴就指情況極不理想，因為香港家居細，等候送檢期間更或引致全家中招。他建議輕症病人若果自願，可以前往內地指定地點治療。