（獨媒報導）每年預算開支2.7億元的18區「關愛隊」，率先在南區及荃灣試行，立法會一個委員會下午討論成效。議員們繼續要求增加關愛隊撥款和資源，民建聯陳勇聲言「就算支持消防員，都要畀佢啲水吖，無水乾塘呢，唔救得幾多㗎咋嘛」。不過他的黨友鄭泳舜就擔心近日坊間有印象，但凡冧石屎和交通意外，「咩都係關愛隊去搞啦」，他提醒其他部門才有權責，例如強制驗樓驗窗，「屋宇署二千人喺度返工喎，係佢哋做㗎喎。」
陳勇
根據立法會文件，其餘16區的「關愛隊」遴選工作，預計今年第3季可以「逐步起動」。立法會「民政及文化體育事務委員會」今午討論南區及荃灣的成效，如何令其他區「借鏡」。暫時兩區的「關愛隊」成員已達408名，如果按此規模，全港最少有3,600名成員。
陳勇：無水乾塘唔救得幾多 倡各政策局注資
議員們繼續爭取關愛隊的資源以及地區辦事處，亦質疑長遠計算，關愛隊單靠捐款不能維持。民建聯副主席陳勇稱對兩區專員的工作匯報很「感動」，因為感受到關愛隊為地區「包底」。不過他同時指，關愛隊要「堅持落去有好大難度」，答案是「資源啊」，他稱「就算支持消防員啊，你都要畀佢啲水吖！無水乾塘呢佢唔救得幾多㗎咋嘛」。
如何增加「資源」？陳勇提出「關愛隊都要關愛支援」，他建議不同政策局工作都包括地區工作，若局方的資源「做唔嚟」，可以將資源「注入關愛隊」，例如創科、環境、文化當局都要做社區推廣，但「幾個人做唔到全港」，不如「一次過交埋畀關愛隊」。
鄭泳舜
鄭泳舜：乜都關愛隊搞呢，我有少少擔心嘅
委員會主席、民建聯的鄭泳舜亦有意見，不過是表達其「擔心」。鄭泳舜指最近坊間予他感覺，「咩嘢都係關愛隊做啦」，例如「旺角道冧石屎，啲人話哎搵關愛隊去搞啦。交通意外，關愛隊去搞啦。廢物徵費，關愛隊去搞啦。劏房租管，都話關愛隊去搞啦」，他激動表示：「喂，乜嘢都關愛隊去搞呢，咁啊啫我有少少擔心嘅。」
他續向出席會議的民青局局長麥美娟表示，希望政府向部門講解權責，例如強制驗樓驗窗，「屋宇署二千人喺度返工喎，係佢哋做㗎喎，唔係關愛隊去做」，「呢啲工作，佢都要有返佢哋既責任」，他表示自己最不希望見到，「前線嗰啲叫哂關愛隊去」。
鄭泳舜發言愈見起勁，提到最近有輕生個案，「啫當然，我哋啲關愛隊可以去關心，但最後都係要衞生局、前線果啲醫護去做」，他指這些是醫護的「分內事」，理應由醫護「做多啲」。
麥美娟
麥美娟：關愛隊不能代替專業
麥美娟回答說：「主席（鄭泳舜），你真係非常之了解」，她指關愛隊過往數月努力，「關愛隊幫到你」的形象非常深刻，但關愛隊不能代替「專業服務」，作用只是令專業人士在落區時「有更多支援」，她再三強調關愛隊「樂意協助」、「本職一定做好」，但「點樣做都唔能夠代替專業同事」。