【獨媒報導】政府上月起落力宣傳「你好，香港！」活動吸引旅客，惟近日內地團「攻陷」土瓜灣區，旅遊業的人手能否應付現時旅客量亦成為其一焦點。自由黨邵家輝坦言，有商戶因未能請人而被迫不能營業，又指近日盗竊案比率高企，與旅遊業人手嚴重不足有關，促請政府輸入外勞。

邵家輝：商戶請人難被迫拉閘

自由黨立法會議員邵家輝、張宇人及易志明今在立法會回應新一輪人力資源推算，批發及零售界邵家輝指表示現時各業界人手嚴重不足，並擔心人手不足影響行業的安全，促政府輸入外勞：「個個都請唔到人，唔單止公司嘅工資上漲，我啲零售嘅舖頭有啲甚至話，佢直頭要拉閘，開唔到門，有啲一千呎嘅舖頭得一個人睇住。你睇早兩個禮拜公布出嚟嘅嗰個罪案率盗竊率30幾%，亦都係其中可能有機會嘅原因，就因為人手唔夠。」

他續稱，因為無法聘請人手，有業界即使知道旅客重來香港都不願營業，「之前有個3,000人 case（個案），喺國內過嚟香港諗住幫襯，跟住話旅遊巴冇導遊，打道回府返深圳，都唔知發生緊咩事」。他認為政府年中才檢討人力政策太遲，促請政府盡快輸入外勞。

張宇人：要釋放勞動力都釋放晒

飲食界張宇人亦同意，指輸入勞工可以短暫改善業界人手不足，並質疑工會「要釋放勞動力」的說法，稱：「即係大家唔好成日聽到啲工會代表講話釋放多啲勞動力，其實我諗要釋放都釋放晒」。他續指，現時負責接待旅客的運輸、酒店和飲食行業都人手不足，有必要輸入外勞，特別是居住大灣區的人士，指他們無需在港居住。

易志明促政府面對現實：我要一萬人，你唔好俾一千人

航運交通界易志明亦稱，現時運輸業人口不足以應付旅客：「我哋能唔能夠滿足到宜家政府向外宣傳『Hello! Hong Kong』。」他指現時業界有有近2萬個空缺，在三跑開始使用後空缺更會增至5萬人，「真係要面對現實，唔好畏首畏尾，大刀闊斧，我要1萬人你唔好俾1千人我，你俾1千我係幫唔到香港」。

他補充，從前輸入外勞最大困難是要包住宿，建議政府參考澳門輸入珠海勞工，提供相對便宜住宿費。他又稱本地勞工無需因外勞而擔心工資減少，強調外勞工資以行業薪金中位數而定，若香港環境不佳亦會優先照顧香港同事，外地勞工沒有工作簽證便會離開。

被問及政府只針對個別行業引入人手計劃的看法，邵家輝回應指計劃未有幫助批發零售業界，表示現時工資已上升近20%，招聘工人仍相當困難﹐又指現時香港經濟仍未復甦，成本上升只會令中小企業倒閉。