爲配合政府嘅「美化市容」政策，路政署計劃喺中環、大圍、荃灣三地引入「特色街名牌」；有關嘅街名牌打算改用「文悦古典明朝體」作爲新街名牌字體，放棄沿用多年嘅 Transport 同全眞粗黑體，聲稱可以「注入較爲濃厚文化氣息／氛圍」。
相信睇到呢度，大家都應該知我哋對呢個計劃持咩意見。路牌背後嘅設計標準係經過細心設計同實證而得出，路政署咁樣一聲令下要用一隻「古典明朝體」嚟試圖改善市容，祇會引嚟反效果。
喺講今次使用嘅「明體」之前，先講講呢啲設計需要考慮嘅因素。喺公共設計嘅準則上，路牌等等嘅公共指示牌應該係「Perceptible Information」。喺追求美感得嚟，必須考慮到可讀性同易辨性，否則喺缺少功能性嘅情況下，套指示牌用幾貴嘅物料同字體都係無用。
道路研究社圖片
講起功能性，就要講吓香港路牌嘅英文字體 Transport。Transport 係因應五十年代英國快速公路誕生而設計嘅專用字體。作爲一套路牌字體，除咗考慮到美觀與否之外，佢嘅設計更加有特別着重喺功能性上嘅發揮。當年設計 Transport 時，經過多次反覆實驗去測試佢嘅可讀性、易辨性，務求駕駛者喺高速移動時，離遠都可以睇得淸楚。
需要特別注意嘅係，街名牌唔祇畀行人使用，更加係駕駛者唯一用以得知自己所在位置嘅街道設施。因此，如果字體易辨性低，駕駛者需要額外花時間去閱讀理解，隨時可以引致擠塞、不必要嘅誤解，甚至因而導致交通意外。
運輸署喺一年前推出嘅行人指示牌雖然喺唔同方面都有改進嘅空間，但據悉工程團隊喺指示牌設計嘅階段，都有邀請唔同年齡層嘅道路使用者做實證試驗，收集使用者嘅意見，以便發揮指示牌應有嘅功能。唔知路政署決定改用「文悦古典明朝體」之前，有無做過類似嘅實驗呢？
再講講「文悦古典明朝體」係咪適合喺政府嘅街道設施上使用。我哋唔否定「文悦古典明朝體」喺追求古風嘅宣傳文本上嘅效果，但文悦官方網站上形容字體充滿「人文感、手作感、古拙感」，又係咪可以配合到香港由楷書書法、北魏體，以及照相排版所形成嘅街道視覺文化，而且配合香港視覺文化上對「端莊大方」嘅理解？
公共美學除咗追求功能，更講求同環境嘅配合，務求喺唔同情況下除咗有權威咁 stand out 之餘，更加同周邊「打成一片」。其中一個比較失敗嘅例子，就係因爲使用「POP 體」，被唔少人揶揄似大富翁錢幣嘅澳門大西洋銀行鈔票設計。退一步睇，如果香港街名牌改用 Comic Sans 同華康少女體，你又係咪接受到？
無估到我哋上星期先讚完運輸署針對 TPDM 路牌嘅弱項作出改善之後，路政署就靜靜雞提出咗件咁嘅建議。作爲道路愛好者，我哋對路政署嘅諗法不外乎係遺憾。路政署等嘅部門或者需要三思，咁樣改字體係咪可以叫「美化市容」？不如淸咗街邊啲污垢同雜草先啦。
註：TPDM 全名爲 Transport Planning & Design Manual，又稱爲「運輸署天書」。但街道路牌屬路政署管轄，設計標準不受 TPDM 所規範。
（本網歡迎各界投稿，文章內容為作者個人意見，並不代表本網立場。）