【獨媒報導】中央港澳辦主任夏寶龍昨日在國安教育日講話期間，提到時代、內地在變，整個市場結構、消費模式都在改變，要主動適應時代發展潮流，積極識變、應變、求變。全國港澳研究會副會長譚耀宗今早（16日）在新城電台節目分析，夏寶龍是為香港經濟「開藥方」，認為香港與內地尤如「龜兔賽跑」，內地疫情期間飛速發展，許多方面已追上香港，並提醒要思考新出路。
譚耀宗今早在新城節目表示，夏寶龍早前來港調研考察，已知悉將完成23條立法工作，今次講話則是經過調研工作後，為港把脈開藥方：「今後我哋要注意啲咩問題，我哋有乜優點、有乜獨特之處，但係呢，我哋都要面對宜家形勢嘅轉變。」
譚耀宗：內地大膽創新 香港要主動適應
本身是全國港澳研究會副會長的譚耀宗，他認為夏寶龍對港作出鼓勵：「好多優勢！呢啲獨特地位要鞏固好、發揮好，但係淨係咁樣唔夠，我哋仲要面對⋯⋯呢個金漆招牌，但係呢畢竟好多嘢係變化緊，國際好，內地好，香港本身自己都要適應。」
談到本港適逢由治及興，譚耀宗認為港人適應能力強，會因應周圍環境及內部變化，而不斷作出轉變：「你睇國家開放，我哋呢四十年都係咁，係咪？亦唔需要話太擔心，但要主動！主動適應呢個新形式，用舊嘅方式去解決新問題就唔得㗎啦，需要大膽創新。其實呢個咁嘅諗法同內地都係一脈相承，你睇宜家內地，都覺得內地發展得好快、好好呀，真係我哋諗到一樣嘢，佢都做到出嚟。」
讚內地適應能力強 三年疫情期間不停步
譚耀宗又大讚內地適應能力強：「我哋有時返到內地，覺得佢哋啲服務唔得嘅，呀！唔係！佢就算有啲質素唔算好高，但係佢有感情搭救，佢用態度，好熱情咁樣，令到你有所感覺。」然而，譚耀宗認為，內地亦要與國際競爭，所以提出高質量發展，向新材料、新能源方向發展：「我哋如果仲係生產嗰啲原有嘅產品，唔得㗎啦嘛，賣唔到咩錢，可能要去其他地方生產啦！我哋要啲高質量！」
此外，譚耀宗指內地在新冠疫情三年間，發展沒有停頓：「所以有人形容好似龜兔賽跑咁，本來嗰幾年疫情，我哋好多嘢都停咗，但當我哋一開返關口，一返去覺得，咦，唔係喎！佢哋好大變化喎，佢唔係三年全部停晒喎！」
譚耀宗稱本港自身條件不俗 毋須鬥平
對於港人北上消費，譚耀宗認為本港亦要思考新出路：「如果我哋唔諗啲出路，只係同內地喺度⋯⋯咁多人返咗內地喎⋯⋯點啊呢？箇中咩原因呢？」他表示「叫人唔好返去」作用不大，反而應吸引更多外地、內地遊客來港：「我哋自己點樣去做好啲！」
譚耀宗分析稱本港的自身條件不俗，包括擁有全球食材、上乘的烹飪技巧及不同菜式，能吸引要求高的旅客來港：「唔係要求嗰啲⋯⋯唔係同人爭、鬥平，鬥平無意思嘅！」
喚提供內地未能享受的體驗 促嚴懲服務業害群之馬
被問到擴闊自由行是否能振興本港經濟，譚耀宗就反問：「中國14億人口，有幾多人嚟過香港？我諗個百分比仲係好少嘅，好多人其實都想嚟嘅。」他認為，內地市民或受到經濟、本身是公務員等條件限制，所以未能來港，本港應要思考，是否能夠提供內地在未必能享受的體驗。
譚耀宗最後表示，必須嚴懲本港服務業的害群之馬，「買嘢又呃人秤」、賣假貨及的士劏客：「我覺得呢啲唔要得，一定要懲治！我哋金漆招牌就係俾呢啲搞彎」。