【獨媒報導】警務處處長蕭澤頤接受港台節目《舊日的足跡》訪問，指自己很喜歡警察的工作，曾下班後繼續巡街捉賊，甚稱「好enjoy份工，我真係可以一個禮拜做7日」。他自言不是稱職的丈夫和爸爸，又透露與兩位孩子無經常溝通，感激太太十分稱職，讓他可以專心工作，無後顧之憂，「可以有一個咁嘅太太係一個福份」。
父親反對大學未畢業入警隊 「唔認你做仔」
節目主持車淑梅問蕭澤頤為何要加入警隊。他指由於父親同為警察，自小受他影響，故當警察便成為「我的志願」，而且警察的工作有意義和有正義感，自己亦很喜歡維持治安，甚至最初在慈雲山執勸時，「當年自己會夜晚自己一個出去捉賊，甚至乎收工喺夜晚會睇吓有冇賊拉⋯⋯去後巷巡吓，真係好enjoy呢份工」。
蕭澤頤提到中三到英國讀書時，由於很想做警察，「做一個警員我都鍾意」，曾打算中學畢業後立刻返港投考警隊，但父親希望他繼續讀書至大學畢業，極烈反對他回港，「佢甚至乎去到一個地步呢，一定堅持做警察，我就唔認你做仔」。
蕭澤頤、車淑梅（港台圖片）
老婆對狂工作不詐型 「我咪繼續放肆去做囉」
在節目中，蕭澤頤講到自己家庭。他坦言「好老實講，我唔係一個稱職嘅丈夫，唔係一個稱職嘅爸爸」，他解釋自己「好enjoy份工，我真係可以一個禮拜做7日」，甚至曾經有女同事跟他說，「如果我係你老婆，我一早同你離婚！」又自嘲「其實我都覺得（自己）幾過份」。但他笑指是被太太寵壞，「因為佢無詐型呀嘛，咁我咪繼續咁樣放肆去做囉」。他亦透露，與家中兩位孩子沒有太多溝通，而他們沒有當警察的興趣。
車淑梅問到是否滿意自己人生，蕭澤頤指做到自己想做的事已經很滿意，但希望有「追求一個有回憶的人生」，因為每當想起與同袍出生入死、齊上齊落的回憶時，會感到很開心，亦希望退休時，有一個「陪家人的人生」。另外，蕭澤頤多次讚賞太太「好好」，又點選陳百強《有了你》給太太，感激太太處理家中大小事，不用他憂心，讓他集中於工作上，又多謝她多年來的照顧，讓他無後顧之憂，「可以有一個咁嘅太太係一個福份」。
自評60分 蕭澤頤：中規中矩 好多嘢可以再做好啲
2021年6月，蕭澤頤委任為警務處處長，至今成為警隊「一哥」逾一年半，車淑梅問如何評價自己表現。蕭澤頤指，「要自己評價自己比較困難啊，如果你真係要我評價，我會話中規中矩，60分啦，我永遠覺得有好多嘢可以再做好啲嘅」。他指，現時令他最苦惱的是警隊人手短缺，現時有2.7萬名警員，但仍缺逾5,000人手，所以一直思考如何為警隊「do more with less」，為同事提供足夠支援。
他提到2019年社會事件，稱警隊有更多地方可以做得更好，如現在學會在失實資訊出現兩小時內作出澄清。他指，2019年有很多假新聞和假消息，亦有不少文宣抹黑香港政府及警隊，當時與被捕的青年傾過，發現他們每天花4至5小時瀏覽社交媒體，令他深感明白「一件事，你睇一次未必信，但睇10次，你就堅信呢個係事實」，並需要在公關上下苦功。
稱年輕人有「後悔之心」 一定給予機會
蕭澤頤在訪問中，強調希望給年輕人機會。他認為，若年輕人承擔法律責任，並有「後悔之心」，一定會給予他們機會，「如果我哋抱住一個諗法，唔畀機會佢哋，推埋一個牆角，到最終邊個會去找數呢，就係成個社會，而邊啲人最開心呢，就係背後（話你聽）『嗱，呢啲人就係唔畀機會你』，然後繼續抗爭」。
他指經歷2019年社會運動後，警隊正努力「reconnect」對他們有特別意見的市民，「我唔夠膽話做得好好，宜家仍然一路做緊嘅⋯⋯但睇得到有改變⋯⋯兩三年前對我哋有啲意見，有慢慢轉變，呢個係我覺得欣慰嘅地方，當然我覺得仲要再做多啲」。
一時感觸哽咽 寄語年輕人守法
車淑梅追問，有罪的年輕人是否有可被免罪。蕭澤頤指，若犯案程度輕微，會警司警戒，不留案低。若犯重罪就要留案底，「呢個程況係改變唔到」。但他指有案底的人也做到傑出青年，「最重要係守法，必定會有美好前途，過往有好多呢啲例子」。他一時感觸哽咽稱，「希望年輕人要守法，因為當佢哋犯法嘅時候，最大受害者係佢哋本人同屋企人」。