【獨媒報導】國安法實施一年半，《蘋果日報》及《立場新聞》多名高層被捕，先後宣布停運；《眾新聞》月初亦因擔心步《立場》後塵，宣布停運。《眾》主筆楊健興曾表示，近年媒體被捲入政治巨浪，警務處處長蕭澤頤今以反問回應：「呢個巨浪究竟係邊個喺度興波作浪呢？」他暗示有媒體荼毒年輕人上街：「如果大家去講自由，調返轉頭，我想嗰啲人撫心自問，係咪問心無愧？佢哋害咗好多年青人，破壞好多家庭。」
被問到警隊來年執法和調查會否以媒體為主、有沒有媒體仍在被調查中，警務處處長蕭澤頤一再強調並非針對某一行業或機構，亦不透露行動細節，但說「嗰啲有關人等呢，佢地自己心中有數」。
指機構運作是「自己選擇」 新聞自由「唔係絕對」
警方今午見記者，講述去年香港整體治安情況。記者會上首條問題，就問及過去一年拘捕多名傳媒工作者，警隊如何看待與傳媒關係。蕭澤頤指機構運作是「佢哋自己選擇」，更反問在場記者：「話我哋殺雞儆猴，話我哋侵犯言論自由⋯⋯今日在座超過三十個傳媒團體，點解大家仍然繼續工作呢？點解相關傳媒停運呢？係咪佢哋自己有心虛呢？」
他以大篇幅表達對「新聞自由」的看法，指「自由唔係絕對」，因在保障國家安全及公共秩序下，很多自由要受限制：「若果任何人本身違法，我覺得佢無資格去講自由。」他引述楊健興在《眾》宣布停運後見記者的說話，稱「有啲傳媒人出嚟講，而家媒體被捲入政治巨浪，我想問返，呢個巨浪究竟係邊個喺度興波作浪呢？」；又指「有人說『記者都係人，都有朋友家人』，但年青人都有朋友家人」。
楊健興月初交代停運原因時，指「記者都係人，都會有家人，都會有朋友，在一個唔安全的情況下，大家都覺得要認真思考呢個問題。我相信所有新聞工作者不希望因為工作而處於呢個困境」；以及「反修例事件後，大家都見到，香港社會政治變化相當大，分化好嚴重，矛盾好尖銳，媒體被捲入政治巨浪，一啲媒體被視為係要整頓的對象，甚至有啲會覺得成個傳媒會係被整頓的對象，呢個係過去兩年睇到的情況」。
稱媒體「害咗好多年青人」 報導純批評不構成罪行
蕭澤頤再引多個不具名年輕囚犯例子，稱2019年反修例運動期間，很多年輕人被捲入政治風波/蕭澤頤形容媒體高層「好多相關嘅人，最少都可以坐喺隻船到」，但年青人「無辜喺個海度游游吓水，就畀你捲入咗個巨浪」。
有記者指傳媒職責就是引述不同聲音，但如果聲音引起人對政府仇恨或反感，就歸咎傳媒的做法是否公平，並追問蕭澤頤紅線如何劃。蕭回應指，每日都有報章批評政府，單純批評不構成罪行，要看背後意圖。
