【獨媒報導】民政事務局局長徐英偉等13名政府官員周一（1月3日）出席港區人大代表洪為民的百人生日宴，會上一女士初步確診，徐英偉被列作緊密接觸者，送往竹篙灣檢疫中心。前保安局局長、新民黨主席兼行會成員葉劉淑儀在商台《在晴朗的一天出發》中炮轟涉事官員：「去咁多應酬把鬼咩，收咁多禮物做乜啫你哋，一個二個得閒喺屋企睇多啲文件，做多啲政策研究、落區好過啦。」但拒就徐英偉應否下台表態。
葉劉稱徐英偉仕途必受影響
被問到徐英偉應否問責下台，葉劉表示不直接評論，但多次批評對方疏忽，相信事件必然影響到徐的政治前途，「唔知點解佢哋咁得閒去應酬。」她又直言：「唔係淨係佢一個人唔好彩囉，其實就唔應該去啦，應該早早離開就算啦。」她又指，反而明白議員出席宴會當作「謝票」，「好多都係去一去就走，留低食飯喎？好危險囉。」
在多名政府官員中，徐英偉確定有留下用膳。葉劉繼續狙撃：「除非佢同洪為民交情好好啦，可能未做官已經同佢好熟。」但無論交情如何，官員在Omicron疫情下都應審慎，「唔好累政府，唔好累社會啦。」
葉劉未有就徐英偉應否下台表態，「佢嘅任期都只係剩返不足半年，宜家搵人唔容易」，故交由行政長官林鄭月娥決定。被追問如果徐的任期多於半年，是否便須下台，她認為「繼續擔任係好有問題」，傳媒及議員都會質疑事件。她又形容事件「幾嚴重」，但不會斷言徐的政治生涯已劃上句號，「唔知下屆特首邊位啊嘛，或者好鍾意佢呢。」
稱食飯無謂 以前下班回家仍要睇文件
對於官員應該如何處理宴會邀請，葉劉指官員只要禮貌上到場致賀酒便可，無需逗留太久，「食飯無謂啦。嘥時間、唔健康。」她認為官員應該很忙，「我自己以前放工返屋企要好多時間睇文件，唔知佢哋點解咁得閒周圍去。」她又批評公務員紀律懲處制度了勝於無及過時，最多只是發出書面警告，阻礙升職。
其他到場官員包括警務處處長蕭澤頤、入境處處長區嘉宏等紀律部隊首長，葉劉指紀律部隊首長擁有實權，一向甚受商界及政界人士歡迎，所以更應檢點，盡量減少應酬。
林鄭昨日於記者會上指官員要為行為負責，葉劉表示：「佢係被伙記連累嘅，但政府應該有啲清朗行動，提下啲官員無謂嘅應酬無謂去。」她又提到，新民黨立法會議員黎棟國只到場簡單道賀，7時半前已離開。
葉國謙：不覺得要人頭落地
另一行會成員、民建聯葉國謙則表明不覺得徐英偉要「人頭落地」。他強調自己沒有因為與徐同屬民建聯而有偏袒，「有不足嘅地方，你就必須要承認，但又唔能夠話因為某啲官員做錯某一啲事，樣樣就落台、落台、落台，咁就可以解決問題，我又唔同意」。
他稱出席官員缺乏政治敏感度，但認為「政界嘅朋友……咁高興嘅日子，始終有私人感情。」他提到，問責制是官員對施政上的失誤需要負起責任，「但如果你話問責制，因有任何呢啲事就要人頭落地，我認為唔係合適做法，只需自己反省。」
葉國謙又提到，徐英偉已在Facebook上致歉，隨即多次被主持追問是否足夠，葉反問主持「咁你覺得點樣先叫合適？先叫問責呢？」
對於徐英偉逗留時間比其他官員更長，葉認為官員簡單致賀是恰當表現，惟形容徐有所疏忽。被問到如果有受邀會否出席時，葉回應指「如果有時間，我可能都會出席㗎」，但強調自己不會除下口罩。