（獨媒報導）屯門大興邨興平樓發現逾15宗初步確診個案，須延長圍封至明早。有撤離住戶將寵物轉交予家人，家人則批政府行動誇大病毒嚴重性：「其實冇咩嘢，好似傷風感冒咁啫」。
陳女士及丈夫今午到興平樓，從身穿保護衣的工作人員手中接走兒子的三隻貓及一隻狗。 陳小姐表示，其兒子需到隔離營接受兩星期隔離，但寵物不能獨自留在家中，無人照料，故前來領走暫養。
對於寵物由昨晚隔離至今，陳小姐無奈嘆「唉！我都唔知點講。」她又指不擔心兒子染疫，批評政府行動誇大病毒嚴重性：「政府搞成咁樣啫，其實冇咩嘢，好似傷風感冒咁啫，搞到好似全世界都好慘咁。」
下午六時半，有身穿保護衣的漁農自然護理署職員將一隻兔仔接走，送上貨Van離開。
住戶急尋暫養 稱絕不交予漁護署
另一住戶羅小姐家中有兩隻貓，她表示自己暫時不需撤離，但仍考慮提早將愛貓放給家人暫養，以防萬一。有指漁護署會派人接收須撤離住戶的寵物，她果斷稱不會交出愛貓：「接走都唔知對你嘅貓有冇傷害，分分鐘死埋都唔知！」
住戶黃小姐家中則飼有三隻貓，她今早發現對面單位鐵閘被貼上疑為確診字條，自己亦打聽到住在對面的婆婆確診，擔心自己亦需要撤離，留下愛貓在家無人照顧。她起初焦急指，自己暫時未尋獲可暫養人士，「人唔怕，最擔心係啲貓！」最後成功找到有心鄰居幫忙，才放下心頭大石。
圖由受訪者羅小姐提供
圖由受訪者黃小姐提供
居民睇新聞始知要撤離 斥安排混亂
衞生防護中心傳染病處主任張竹君表示，興平樓確診單位共涉及14個，當中20及21坐向單位已經撤離，19及42坐向單位、9樓及10樓13至24坐向單位亦須要撤離。
住戶簡先生居於42號單位，惟從未獲通知需要撤離，「（自已）睇衞生署記者會講要撤離」。他批評政府安排混亂，延長圍封但沒有派發早餐，在圍封前又曾要求興平樓居民自行前往檢測，他亦在圍封前到兆麟社區會堂進行檢測。他形容，有不少住戶「排個幾鐘先排到，陰性又唔俾走，測完又要再測」。