【獨媒報導】一名疑似警員在網上購買球衣後，不滿代購商「拖延」交收，遂向對方發送一幅含半截委任證的照片，上面印有警隊標誌，恐嚇「一係今日交收，一係刮你出嚟，自己睇路」。警察公共關係科回覆《獨媒》查詢時表示，正了解事件。 警方強調，一直重視人員的操守和行為，如有個別警務人員涉嫌違紀，將會作出跟進，並按既定機制公平公正調查。

該名疑為警員的人士，向 Facebook 專頁「韓職K League球衣代購」購買一件南韓國家隊更衣室球衣，售價1,399元。他不滿對方未有如期發貨。店主下午在專頁稱，承認遲了寄出，但強調在球衣到貨兩日後曾向對方表示，將會在翌日寄出，但仍遭對方不斷轟炸，更出示委任證恐嚇。

他及後收到球衣，但在專頁留下劣評，斥對方「貨到後應承寄衫不停拖延，如果唔係講哂粗口都唔肯寄衫」，質疑「今日上晝話中午寄，中午話下午寄，夜晚話聽日寄。之後再話呢幾日寄」，批評對方「訂就識收足，貨到就不停拖個客」；表明「一定唔會幫襯！仲慘過求你去寄件衫比個客。永遠不會再幫襯！」

「韓職K League球衣代購」店主在該帖回覆稱：「當時只係到咗貨兩日，開頭係話咗聽日寄，但突然有事唔得閒都通知客人，講咗幾日內會寄出，但客人不停催，仲攞自己嘅《警察委任證》出嚟，話再唔寄就開案，最後唔想煩包佢運費搵速遞當晚即刻送貨。」

他又曾對店主表示，「如果唔係我自己開個RN揾人刮你」，疑威脅或可能在警隊報案簿立案調查事件，喚對方做定心理準備，「路比左你揀」。

《獨媒》已向「韓職K League球衣代購」店主查詢及了解事件，正等候回覆。