（獨媒報導）「完善」後立法會雖然沒有反對派，但仍出現議員被逐的火爆場面。實政圓桌田北辰在立法會衞生事務委員會上，打斷醫務衞生局長盧寵茂發言，主席張宇人批評田北辰無禮貌，「田二少」不甘示弱反擊主席「燒晒我時間」，掀起逾三分鐘罵戰，以田北辰被逐出會議廳告終。田北辰在離開會議室前，更拋下一句「我忍咗你好耐啦」；他之後向《獨媒》強調「我唔係畀佢趕出去，我係自己行出去。」
田北辰
田北辰為「完善」選制後第一位被逐出議會的議員，他向《獨媒》表示「以前嘅做法就好均真嘅，如果議員同主席有唔同意見，會畀返時間。」他強調，當時只想提醒局長盧寵茂，確診數字並不單是百分比跌，實際數字亦有下降，故並不是追問，反問「依家時間燒晒係度，條數點計？」
被逐後怒轟張宇人掗拃 半小時後表示「我對事不對人」
田北辰續稱，「事實上我係忍咗佢好耐。佢係一個好掗拃嘅主席…成日喺度問問題，根本主席就唔應該用議員時間問野」，又稱「我做主席嗰陣永遠唔喺人哋嘅時間加把口…佢就唔係嘅，呢樣已經唔合規。」
「冷靜」半小時後，田北辰「埋咪」再向傳媒交代事件，指剛才發言旨在「澄清事實」，認為身為議員有責任監察政府，「當一個官員講一啲『事實』嘅時候，係同我理解唔同，我有需要即時澄清。」回想事發，他承認有「少少情緒」，導致「不愉快場面」出現。他仍表示「唔好意思，我基本上係對事不對人」，並重申「啱啱絕對唔係插嘴追問，只係澄清一個事實。」
醫務衞生局長盧寵茂
事件沿於田北辰問盧寵茂有關入境人士檢疫政策會否進一步方寬至「0＋7」，不用酒店檢疫，但盧寵茂表示一切要看數據，亦要考慮入境人士帶有變種病毒的風險，稱政府會繼續監察。田北辰不滿答案，打斷局長發言，以下是四分鐘罵戰節錄：
（田：田北辰，主：張宇人，局長：盧寵茂）
田：但最近實際嘅數字
主：你等局長答晒先啦好唔好
主：你同我講嘢，唔好直接同局長講嘢好無
田：主席啊我想問局長
主：你等佢答埋先，佢而家未答完
田：主席你唔使咁樣樣
主：我唔係唔使咁樣樣，呀田北辰議員，我已經同你做同事做咗好耐（田：呢個係佢要答嘅問題），你係時時插口，喺任何議員官員答嘅時間，我希望你有啲禮貌，等人答完先，唔好插落去
田：我係非常有禮貌，主席你插口我就唔覺得你好有禮貌
主：我有責任維持呢個議會嘅一個順暢運作（田：我都有議員責任）我都有責任，等官員去答你嘅問題。我而家聽緊佢答緊你第一個問題，未去答第二個問題
田：你因間畀返一分鐘我
主：我唔會畀任何時間你！
田：咁你而家燒晒我時間嘛主席
主：我唔係想燃燒你！你而家係同我講嘢
田：正話局長話輸入個百分比
主：局長請你繼續，熄咗田北辰個咪吖唔該
（發言鐘響）
局長：整體「3＋4」睇唔到爆發風險，適時檢討入境人士檢疫
主：佢第二條問題你書面答佢啦唔該，下一位
田：你燒咗我一分鐘
主：唔該熄咗田北辰議員個咪，田北辰議員如果你繼續喺度發言嘅呢，我就要請你出去架喇，
田：你係應該畀返一分鐘時間我
主：我無需要要畀任何時間你！
田：局長無問我問題，你唔應該答
主：田北辰我已經警告咗你，叫你唔好再發言，唔係我要請你出去架喇
田：我都係咁講，局長話可以答我問題
主：秘書！請田北辰議員出去！
（全場靜默）
田：你請我出去嘛！
主：唔緊要呀，你係咪想我請你出去吖！我唔介意㗎！
田：你請我出去吖！
主：而家咪叫秘書請你出去囉！
田：你燒晒我時間，局長想答你都唔畀佢答
主：你從來都係，多年來官員去答問題嘅時間，你永遠插個咀喺度，其實你問問題官員答問題，唔得係你一個人聽㗎，其實市民聽緊其他同事聽緊，我係有責任畀官員清晰清楚去答你哋嘅問題㗎。我哋而家休會五分鐘！
