【獨媒報導】發展局擬在灣仔北海濱用地，興建大型展館介紹北部都會區、交椅洲人工島等項目，建造費達6億至7億元。多名立法會議員不滿，政府將「北都展館」與新田科技城項目綑綁，申請300億元撥款是不妥當，當局最終抽起改為單獨申請撥款。發展局局長甯漢豪否認是「博大霧」：「其實無得博嘅，今次我哋擺得喺度呢，就預咗大家會睇，其實去到工務工程小組，就越嚟越睇得聚焦。」不過，她稱會考慮將展城館的規劃展覽內容，整合至「北都展館」，從而騰出展城館的地方。
甯漢豪今早在商台節目《千禧年代》中，解釋興建大型建設計劃展館的構思，稱聽到不少建議稱：「既然你做咁多大型項目，都係未來香港嘅策略增長區，不如好好地搵展示俾市民，同埋訪客知道香港嗰個前景，有呢啲大型發展項目係點樣啦。」
甯漢豪（資料圖片）
新展館擺北都定市區？ 甯漢豪：兩派嘅意見都有
談到選址，甯漢豪稱「地我哋一定搵到」、「選址有好多空間去傾」，而就選址在諮詢意見的時候「兩派嘅意見都有」：「擺喺北都，北都咪就係策略增長區囉，擺喺嗰度好陪襯。」
不過，甯漢豪提到，當局希望在2027年前完成規劃北部都會區，已有不少建築工程進行中：「如果嚟香港嘅訪客，佢哋會唔會自己走去北都，可能會多啲金紫荊、會展呀。從呢個角度，擺喺我哋提議灣仔北演藝學院對面嘅地方，有佢嘅道理喎。」她同時澄清，指灣仔北相關地段並非「黃金地段」，當局無意推出賣地作商業用途，「不嬲都係規劃咗做一啲政府機構設施」。
多名立法會議員日前不滿，政府將「北都展館」與新田科技城項目綑綁申請撥款是不妥當，當局最終抽起改為單獨申請撥款。甯漢豪否認是「博大霧」，並希望外界不應有疑惑，稱當局十分坦誠：「所以我哋都即時講咗唔緊要，大家唔希望我哋擺埋同一個撥款申請，我哋拎佢出嚟。」
建造費高昂？ 甯漢豪：係睇樓面嘅
被問到有議員建議利用中環展城館作展館，可以更節省資源，而且位於較旺的地段。甯漢豪稱展城館展示本港規劃歷史，同意可研究將展城館規劃展覽內容整合至大型建設計劃展館，從而騰出展城館的地方，「我哋覺得都係一個好意見」。
外界有聲音質疑，大型建設計劃展館建造費高達6至7億元。甯漢豪則稱「係睇樓面嘅」：「睇返樓面平均建築費，其他起嘅大廈其實相若嘅，反而我哋如果多去解釋呢，我覺得呢個未必係議員最會爭持嘅地方。因為數字，我哋議員時常都批我哋工程㗎啦，佢會知道我哋做價係點。」