【獨媒報導】政府預料今年度財政赤字達1,016億元，是連續第二年錄得過千億元財赤，面臨「荷包乾塘」，政府將發債1,200億元增加收入。前財政司司長曾俊華今日在社交媒體撰文，指以前經常被人批評為｢守財奴｣，相信市民現在終於明白為何歷任掌櫃「留住咁多錢喺庫房」。他稱，香港已進入結構性財政赤字年代，就算推出薪俸稅兩級制，都只是杯水車薪。他又擔憂香港借貸度日，「債冚債」令荷包不用多久就「乾塘」，最後加稅加費要由子子孫孫去承受。
薪俸稅兩級制一年不足填20億 形容是杯水車薪
曾俊華今日在社交媒體Facebook撰文，指以前幫香港「睇住盤數嘅人」，包括他在內，被人罵得最多的是做｢守財奴｣，經常被人批評「留住咁多錢喺庫房做乜呢？」曾俊華認為，最新一份財政預算案出爐後，相信市民終於明白歷任掌櫃的用意，「最令大家憂慮嘅，就係香港將要借貸度日。」
他認為，香港無可否認已進入結構性財政赤字年代，稅收大豐收、賣地理想的景象，「恐怕有一段時間都未必可以會重現。」今年財政預算案推出的薪俸稅兩級制，年逾500萬收入的人士需多繳1%稅，曾俊華指歷任財爺在位之時「大家曾經都諗爆頭」，也想不到有那些措施不會帶來極大痛苦，認為全部措施都不容易實行，正如薪俸稅兩級制，若加上住宅物業累進差餉，一年為庫房增加的收入不夠20億，「我哋依家面對緊係千幾億嘅債，呢啲根本係杯水車薪」。
發債利息與銀行相同 難吸引買家
至於政府將發債1,200億元。曾俊華稱，的而且確全世界很多地方都以發債來支持政府的經常運作，但香港只是一個特別行政區，不能大量印錢紙，與其他國家比較就不太適合。他指，要知道永遠不可以用借來的錢應付日常開支，如發債用於大型基建投資項目，待項目落成後有長期經濟回報是沒有問題，「但係如果連年發債，然後係用嚟支付日常開支，以至用『債冚債』，香港個荷包唔駛幾耐就乾塘。」
他稱，庫房空虛會影響信用評級，從外國經驗可見，為了支付債務利息，加稅加費就會陸續有來，然後各項公共服務會「大縮水」，「呢啲都會由子子孫孫去承受。」
曾俊華表示，現時處於高息年代，債券沒有四、五厘息，未必吸引到買家，因為銀行都有相同回報，「但係當你要還咁高嘅利息嗰時，你將借來嘅錢，喺出面做投資，係咪咁容易可以攞到至少十厘嘅回報去支持呢？諗來諗去，都真係好難諗得掂。」
質疑是否與《基本法》量入為出的要求相符
他認為，不能只看收入，一定要減低政府的支出，包括經常開支，亦要留意非經常性開支，「好似基建項目咁，否則我哋永遠都走唔出結構性財赤。」他又反問，「如果我哋唔想辦法搞番好盤數，任由結構性財赤，長此下去，呢個係咪同《基本法》對特區公共財政要量入為出嘅要求相符呢？」
他又自問算是一個樂觀的人，但當看到「自己頭家」，財政狀況每況愈下，「都咪話唔擔心」，「主要唔係擔心我哋呢啲有番咁上下年資嘅一代人，而係會繼續喺香港生活嘅年輕一代人。」