【獨媒報導】五支的士車隊需於今年7月底或之前正式投入服務，不過有車隊難以聘請足夠司機。自由黨立法會議員易志明今早在電台節目稱，的士司機「習慣咗太自由」，需時適應車隊模式，惟認為加入有助收入及聲譽。有聽眾則明言「唔睇好車隊嘅發展」，認為與現時網約平台運作模式無異，只會令司機「攞正牌揀客」。

易志明今早在港台節目《千禧年代》指，曾使用「試運」中的的士車隊服務，形容服務相當不錯，「我宜家去遠少少嘅地方都會call佢哋」。他表示政府曾提及三月底會有車隊正式營運，「所以大家有個期望」，惟認為一年籌備時間不足，包括電動車審批需時，以及聘請司機時遇到困難。雖然如此，他表示自己仍對五支車隊能準時營運感到信心。

易志明：的士司機習慣咗太自由啦

其中一個令司機卻步原因，是工作自由度受限。易志明指的士司機「習慣咗太自由啦」，「 我以往鐘意開就開，唔開就唔開。」司機投身車隊後，亦影響接街客：「我陣間兩點鐘有一個order， 我一點幾嘅嘅時間， 有人提手截車啦喎，我究竟接定唔接呢？」

指加入車隊後「有規有矩」 令司機「聲譽好咗」

不過易志明對車隊營運有信心，稱的士司機最主要考慮入息，轉投車隊後有更多長途客，形容車隊司機收入「相當唔錯」。對於車隊應採月薪制或包薪制？易志明認為分別不大：「其實我不論你用咩制度都好，對一個前線司機嚟講， 最重要係我每個月落袋有幾多錢。」

他指當司機加入車隊後，除了收入有保證，亦可改善司機聲譽：「我係幫邊一個牌子嘅車隊開車，如果俾人口碑讚得好 ，自己都覺得光榮， 你嘅投入感會加強。」易志明指有司機向他表示加入車隊後「揾到錢，又舒服，啲車又好揸」，「又有規有矩，他們覺得自己嘅聲譽好咗。」轉用平台後「啲客好咗呀」，「因為通常你預約嘅，你又願意畀多啲錢」。

至於關口車隊專用候車處，易志明倡當局盡快開放，增加司機加入車隊誘因，「你都畀咗個暫准營運證我，點解呢啲這些設施唔可以早啲畀我呢？」他又表示有司機反映充電站不足，促政府加設。

聽眾憂車隊令司機「攞正牌揀客」

聽眾王先生則憂司機加入車隊後會「攞正牌揀客」：「你司機睇得到你去邊㗎嘛，個個司機都揀好嘅嘢做㗎啦，唔好嘅咪唔做囉，咁可謂服務呢？你睇吓聯合醫院、全部醫院嗰啲日日都係㗎，人等車呀嘛。」

他明言「唔睇好車隊嘅發展」，指車隊模式與現時網約平台分別不大，「你包裝到車隊有個車隊管理、有個投訴機制，咁宜家咪一樣有投訴機制⋯⋯你美化咗件事，但無改變到嘢囉。」對於開放關口，他形容只是「多個位揀客，唔使排隊啫嘛」，憂造成不公：「令其他正正經經，真係排隊接單嘅司機，佢哋嘅機會少咗囉。」

大黃蜂愛心車隊負責人料5月路面測試

五支的士車隊之一「大黃蜂愛心」車隊負責人黃大海在同一節目指，5月將有200部的士進行路面測試，6月再多400部，7月底將投入餘下400部。他認為車隊模式帶來「一個大改革」，車隊全面採用底薪加奬金制度，為司機提供更多勞福保障。至於會否高於之前收入，黃大海稱難以籠統交待一個數字，強調制度鼓勵「多勞多得」，「我哋的士司機大家都知，係香港獅子山拼搏精神。」

「大黃蜂愛心」車隊股東之一為「的士司機從業員總會」，該會有逾6萬名會員，黃大海稱已「揾齊曬司機」，目前等候內地車廠交付電動車。