施政報告提倡發展新界北都會區，並建議興建多條新鐵路。消息傳出後，網民感覺政府似於地圖上隨便畫幾條線，將各個發展區連埋一齊就算。事實上，根據《信報》引述政府消息人士指，幾項計劃只係處於初步提出方向階段，確實走線、造價預算同時間表通通未有。至於呢幾個項目會唔會影響《鐵路發展策略2014》提出七個新項目嘅推展時間，該報導則聲稱「在不影響現有項目的時間表下推進」。
呢次「完善新界北鐵路網絡」做法，完全顛覆過往鐵路規劃流程。昔日政府若提倡興建新鐵路，大多於「鐵路發展研究」作探究並諮詢公眾；而政府已於舊年底獲撥款進行《跨越 2030 年的鐵路及主要幹道策略性研究》，如果有任何諗法應於研究中處理。縱使如「港深西部鐵路」、「北環線北延至皇崗」、「北環線東延至新界東北」等實屬「新瓶舊酒」，但今日行政長官選擇直接於施政報告，將非常初步嘅構想告知市民，係咪代表各類研究都比唔上「行政長官意志」？
至於新項目會唔會有機會影響新鐵路項目發展時間表，甚至有得「打尖」？參照過去十年「五線齊發，五線總遲」嘅慘痛教訓，如無妥善規劃新鐵路發展進程，最終會因資源「塘水滾塘魚」而出現「累鬥累」情況。現時已進行詳細設計嘅新鐵路項目，包括東涌綫延綫、屯門南延綫、洪水橋站及北環綫，全部都係以服務新發展區或房屋發展為主。而現時仍未進入詳細設計階段嘅東九龍綫、北港島綫及南港島綫西段，本身需要克服更多技術困難，再者對政府而言，呢三個項目可供發展房屋土地空間有限。如再推更多新鐵路，相信都要再繼續讓路。觀塘半山、香港仔、薄扶林等期待鐵路到臨嘅居民，又會唔會願意「犧牲小我」，去成就「配合大湾区发展」嘅大我？
延伸閱讀：
《鐵路發展策略 2000》之檢討及修訂行政概覽（2014年9月）
信報網站：【施政報告】消息:北部都會區運輸系統有待進一步研究 （2021年10月6日）
北部都會區發展策略（2021年10月）
（本網歡迎各界投稿，文章內容為作者個人意見，並不代表本網立場。）