政府於今年五月刊憲，引入區議員宣誓的規定，期間多次「放風」指曾參與或協助民主派初選的區議員將被DQ，並有可能追討過百萬薪津，導致全港超過200位區議員相繼請辭，而黃大仙區的25席中，共有22位區議員辭任。今屆區議會不乏「政治素人」，亦有服務社區多年的經驗之人，一次的立憲修例使他們從此離開政壇。有區議員和市民紛紛表示不捨，亦有人藉此留下心聲。
前區議員──對於即將離任，有甚麼遺憾的地方？
岑宇軒博士（正愛）：
慈雲山街市問題，因為領展收回場地，居民要去毓華街買餸，產生咗環境同
衞生問題。我哋四個慈雲山區議員本來想約埋一齊爭取下，但而家都無機會成事。
許錦成（竹園南）：
好多社區問題我哋都跟進緊，例如黃大仙交通交匯處，樂富地鐵站上蓋，聖母醫院重建等，但可惜而家區議會狀況，我哋擔心無辦法發揮到監察政府角色。
議員辦事處發揮地區諮詢、投訴、協助等的角色已有20多年，居民已經習以為常。一時間真空咗，都係相當可惜。
溫子眾（東頭）：
東頭村道路面不平，去年有運油車漏油事故。我曾經求助政府部門，但事隔一年仍未處理。仲有黃賭毒問題持續多年：新來港婦女就業困難加上疫情，令新蒲崗、九龍城一帶黃色事業猖獗；新落成的匯智樓有非法賭檔；前議員對毒品問題無積極作為，警方部門跟進又不足。
對街坊的寄語？
岑：雖然要暫時退下火線，感到遺憾，但希望黃大仙街坊加油！
許：希望黃大仙街坊繼續關心社區，雖然會遇上困難，但都唔好放棄。喺自己崗位上發揮，令香港成為更安居，更令大家願意願意留低嘅地方。
溫：好好照顧自己，強身健體，保存實力。盡量參與互助委員會、樓層代表、，業主立案法圑嘅選舉，要俾人知道真正香港人嘅聲音。
黃大仙街坊
余：咁多位區議員，辛苦你地啦，短短一年多香港已經變化咁大，仲記得選舉完結後既興奮，辦事處陸續營運，為黃大仙呢個老人區帶來一點新氣象，每次經過你地既辦事處，都會特別望下出面既通訊版有咩更新，雖然依家無晒，但會明白你地離任呢個決定非常困難，日後各自努力，希望再有重聚既時刻：）
黃先生：多謝鄭文杰為天馬苑盡心盡力
蕭女士：致郭秀英女士，我是本區一位街坊，老人家不太懂政治，只知道妳盡心盡力為本區付出多年，很照顧街坊們的需要，是很優秀的區議員。本以為憑著我們對妳的愛戴，會一直得到妳的服務，使本區更美好，無奈妳已辭任。謹致上無限祝福， 衷心感激妳的服務。謝謝妳！
街坊C：多謝你呀淳仔, you will be missed!!!!
Hu：多謝你嘅付出，明白你嘅無奈，支持你嘅退出，同意你嘅憤怒。一齊守護香港。
Simon：各位好，我是黃大仙前溫子眾助理高幹事 Simon (負責勞工及復康部份)，雖然本人因為升學原因而沒有繼續服務東頭街坊，但我們內心亦沒有放棄街坊，希望不久將來可以繼續服務街坊。
Michael：To已離任的正安區黃議員，由小學搬入慈雲山居住，你已經是正安區區議員，一直到我從外地讀書畢業返回香港，你依然是正安區區議員。論認真努力，你一定是第一。默默耕耘實際做事不求功名，多謝你為正安區服務多年。祝你平安、順利。
阿豬包：感謝各位區議員過去嘅努力，比我哋睇到乜叫做服務市民，你們嘅付出，我哋會銘記在心，無論前路有幾難行，我哋一齊撐。