【獨媒報導】今日有傳媒報導，政府擬「完善」區議會制度，將18區壓縮至10區，並提出三個方案，其中方案三為全委任制，民政事務局局長徐英偉今早被問及時，亦未有否認，僅稱正在檢視。自由黨中西區區議員楊哲安得悉後顯得詫異，「吓，呢個邊度出㗎？消息呀？消息？」，又認為全數委任比較極端，落實可能性很低：「如果突然之間無晒，咁你都無咗選舉制度，咁做咩仲要完善選舉呢？」
消息指方案三屬全數委任
《有線新聞》今日引述消息指，「完善」區議會方案有三，方案一為一半議席由雙議席單票制產生、一半議席由防火、滅罪、分區會委員間接選舉產生；方案二為一半議席由雙議席單票制產生、一半議席由政府委任；方案三為政府委任全部議席。
中西區區議會在辭職潮後，只餘下三名議員，包括區議會副主席民主黨楊浩然、獨立民主派彭家浩、自由黨楊哲安，他們皆成功通過宣誓，三人今午皆有出席兩個委員會會議。
楊哲安：委任不必然有問題
楊哲安被問到「完善」區議會的三個方案時，他顯得詫異，「吓，呢個邊度出㗎？消息呀？消息？」記者講述三個方案後，楊哲安表示對委任持開放態度，認為不必然有問題，「選舉文化行得太盡，變咗唔係正面嘅選舉。選舉以我哋而家咁嘅情況，係咪真係一個最好嘅方法呢？」不認為重組方案是民主派形容的「回頭路」，而是「重回正軌」。
（左）自由黨 楊哲安、（右）獨立民主派 彭家浩
不過他認為全數委任的方案三比較極端，「我就咁睇方案三，方案三好似拋磚引玉㗎啫，我唔覺得……呢個比較極端嘅可能性囉⋯⋯如果突然之間無晒，咁你都無咗選舉制度，咁做咩仲要完善選舉呢？」
他續指：「我睇唔到會咁樣發生囉，因為而家講緊完善選舉制度，落實愛國者治港啊嘛。你完善咗之後，就無咗（選舉），就好似你花好多時間煮一碟好靚嘅餸，煮完之後好正啦，然後你倒咗佢，我唔覺得囉。如果佢行第三（方案），咁要解釋清楚。」
楊哲安認為，區議會已經理性化，應該盡快安排補選，「我好希望政府嘅適當時候，盡快進行返一個補選，填返啲空咗嘅位置，咁先可以幫區議會嘅平台，增添返一個廣泛嘅認受性」。
民主黨楊浩然斥取消市民唯一發聲制度
民主黨楊浩然成功過關，被問到宣誓後有否放下心頭大石，他指自己一直以平常心宣誓，沒有特別心情。對於「完善」區議會的三個方案，楊浩然形容為「荒天下之大謬、民主嘅倒退」，「過去一路以嚟，市民幾經辛苦先取消到委任制。我覺得極度失望，《基本法》都有話到最終要達至呢個普選，咁呢個委任制同普選係背道而馳嘅」。
民主黨 楊浩然
他指委任制只會積累民怨，「如果班人淨係做政府中意做嘅嘢，講政府中意聽嘅野，咁政府施政咪容易失誤囉」。他擔心未來委任的區議員會淪為「政治酬庸」，奉勸政府三思後行，「如果中意委任嘅，佢都有好多架構啦，唔需要將唯一市民表達意見嘅制度都取消埋」。
另一名成功宣誓的區議員彭家浩則指，自己抱住「盡自己所能」的心態宣誓。對於「完善」區議會的三個方案，他坦言「唔知政府點諗」，暫時無法評論太多，認為最重要是要確保制度可充分反映民意。