（獨媒報導）城規會昨（29日）舉行最後一場粉嶺高球場發展計劃公聽會，上水區鄉事委員會主席、北區區議員侯志強出席反對計劃。他形容當局在高球場建屋如「剁人手」：「將隻手剁咗，都係三四磅啫，會唔會死呢？唔會死嘅，嗱呢個就係殘廢人。」又稱高球場被「剁到殘廢」後或成「外國勢力」的笑柄。他強調北區其實有很多土地可以建屋，「香港點會無地方吖……你嚟北區，我諗起樓起到政府手軟。」
相關報導：
鄉事派動員撐高球場 有村長斥建屋由朱凱廸提出、接納建議官員「戇Q」
盛智文：高球場起樓如填平維港或在海洋公園建屋
昨日城規會舉行最後一場粉嶺高爾夫球場發展計劃公聽會，聽取個人和團體的申述和意見，反對聲音繼續成主導，其中上水和粉嶺的鄉事派佔用大部分申述時間。上水區鄉事委員會主席、北區區議員侯志強，連同沙頭角區鄉事委員會主席、北區區議會副主席李冠洪一起出席公聽會，二人均反對建屋計劃，合共發言40分鐘。
李冠洪（左二）、侯志強（左三）
侯志強：將一個人隻手剁咗唔會死 但變殘廢人
侯志強形容，政府「剁咗」粉嶺高球場32公頃，致其「殘廢」，影響舉行國際賽事，並以「剁人手」作喻：「點解用殘廢嚟形容呢？一個人，我哋都百幾二百磅，閒閒地吓嘛。將隻手剁咗，都係三四磅啫，會唔會死呢？唔會死嘅，嗱呢個就係殘廢人。」
侯志強認為，北區交通已無法負荷並經常塞車，塞車則會導致更多交通意外發生，「我相信我哋宜家在座都唔係十八廿二。喺我哋呢個年紀，五椏歲以上揸車，當喺條路塞幾個鐘呢，塞多一兩個鐘之後呢，我哋大家都會恰眼瞓、好疲倦，所以形成第二單、第三單、第四單嘅交通意外！」
侯：香港點會無地方，嚟北區起樓起到政府手軟
侯志強稱，北區其實有很多土地可以建屋，「香港點會無地方吖。如果話無地方，唔需要去足十八個區，你嚟北區，我諗起樓起到政府手軟。」鄉議局曾倡於粉嶺高爾夫球場東面的上水丙崗村建屋作替代，侯亦建議於丙崗建屋，如政府以「正常收地價」收地，自己會協助，「如果政府用一個正常既收地價去收呢，我覺得六蚊，我可以協助政府去處理呢個收地問題。」
粉嶺高球場（資料圖片）
他強調，政府收取丙崗村土地後，既可賣地，又不用「斬爛」球場：「當然收地係要啲錢，收高爾夫球場或者大隴農場，已經係政府地喇唔洗錢，但我哋要從一個利益分配資源共享嘅情況下去睇，去收呢啲農地呢可能要十鯪億啦，但係收咗之後就全部都歸政府喎。大家唔好忘記，政府揸住呢啲地，可以拍賣喎。如果呢啲十鯪億嘅地收返嚟去拍賣呢，我夠膽講，大家可以做個承包商，賣到五十億以上，呢個生意何樂而不為呢？又可以收到地，又唔洗斬爛咗個球場。」
指高球場多野嶺沼澤難管理 侯：不如判畀我
侯志強提到，有人認為保育粉嶺高球場低等，但他認為保育與人一樣，沒有高低等之分：「好多嗰啲郊野公園、濕地、雀鳥飛行路線，都要保育，呢個球會唔洗保育㗎咩……保育，有低等高等㗎咩？有冇啊？我都讀得書少唔太明，想咁多位有識之士解釋吓畀我哋聽……我覺得人哋做咗百幾年，係咪應該保留呢？」
侯志強話鋒一轉，又提到中國和香港正被「外國勢力」影響，粉嶺高球場被「剁到殘廢」後將被「外國勢力」嘲笑：「會唔會畀個笑柄、畀個藉口，外國呢啲咁嘅『亡我不死』嘅人士，嚟去取笑，大家諗啊。」他又質疑高球場四處是山頭野嶺和沼澤，政府難以管理，笑稱不如判給自己管理：「邊個去管理呢？不如判畀我管理啦，因為我假假地都喺度有六十幾年嘅經驗。如果要揾康文署、食環署去管，嗰度無水無電無路，蛇蟲鼠蟻㗎喎，點搞啊？到時真係搞到一頭煙。嗱，我當然相信政府點都搞得掂，但如果搞嚟搞去之後呢，會唔會又係畀人一個笑柄呢？」
侯指大隴農場荒廢倡建屋 漁護署：一直使用
侯志強另提議於粉嶺高球場東南面的大隴農場建屋，指農場已荒廢很久：「以前就幫啲咩豬呀雞呀，搞啲咩配種呀，搞啲咩檢疫呀搞啲疫苗呀，喺度搞㗎。但係今日，豬場冇咗、雞場冇左、鴨場冇咗，乜鬼場都冇埋。香港宜家養隻雞都唔得㗎喇，大家都應該清楚。」他認為於該處建屋可興建道路連接粉嶺機動部隊總部，不會影響北區交通，「唔需要經過大頭嶺迴旋處㗎喇，直情喺PTU嗰度，直出雞嶺迴旋處，又或者經和合石村，直剷出吐露港。」
然而在委員問答環節上，漁護署代表被問到大隴農場是否已荒廢，署方表示一直使用大隴實驗農場，用作本地耕作，亦會引入新作業品種做實驗。
質疑土供組2018年僅諮詢「造反人士」
侯志強亦質疑，土地供應專責小組主席黃遠輝2018年沒有在北區做好諮詢，椰榆僅諮詢了權貴和「造反人士」：「四區鄉事會，佢有冇落過嚟做諮詢？北區區議會，有冇落過嚟諮詢？何謂諮詢？諮詢邊個？係咪諮詢權貴？定諮詢啲造反嘅人士？」
粉嶺、上水及元朗東規劃專員陸國安在問答環節被問到相關事宜，他提到當年做了5個月諮詢，透過問卷調查收到29,000個回覆，其他途徑則有63,000個；而透過隨機電話訪問了3,011名香港居民，亦舉辦185場諮詢會，形容諮詢力度不少，「已經廣傳喇，咁你咪嚟囉，如果你對嗰個議題係有興趣的話。」