（獨媒報導）鑽石山荷里活廣場周五（2日）發生致命慘案，39歲男疑兇把兩名陌生女子捅死。事發時附近一名酒樓大廚被拍攝到挺身而出，手持圓凳擋在疑兇與傷者之間。64歲的輝哥表示，當刻連「諗驚」的時間也沒有，只想阻止疑兇：「我唔鍾意佢傷害人、我想阻止佢。」對於獲譽為「英雄」，輝哥坦言不在乎外界看法，最重要是盡力完成想做的事；他又希望外界體諒當時未有更多市民加入協助：「嗰把刀實在太長，係人都驚。你要理解呢樣嘢，唔好怪邊個，冇人要怪。」
以圓凳對抗 廚師輝哥憶述疑兇被打後愕然、「碌大隻眼望我」
事發一日，《獨媒》今午到荷里活廣場觀察，見商場如常運作，涉事3樓已經清理乾淨並解封。商場把Sanrio商舖旁邊的走火通道設為「獻花區」，大批市民到場表達心意。荷里活商場今早發聲明指，對兩名市民在商場內不幸喪生深感難過，今天起暫停舉辦推廣活動一星期。
事發片段在網上瘋傳，一名在附近酒樓任職的大廚當時毅然手持兩張圓凳挺身而出，相隔在疑兇與傷者的中間，被網民形容為「英雄」。大廚輝哥今天仍有上班，他接受記者訪問時憶述，昨午5時許吃飯期間，突然聽到商場有小朋友尖叫，緊接有人大叫：「有人斬人！」他查看後發現疑兇正手持長刀，跪下向躺在地上的受害者「插咗好多下」。
輝哥形容當時自己十分緊張，甚至沒有留意地上有另一名重傷女子：「我當時係緊張到望都望唔到佢。」他立刻從酒樓內取出2張圓凳，希望制服疑兇，趕及時施襲男子已經站立，氣氛凝重，「佢把刀我都好驚呀，把12吋長刀」。
輝哥感覺受威脅，遂用圓凳向疑兇額頭「用力咁挫咗一下」。輝哥指，疑兇之後變得愕然、「碌大隻眼望我」，他以為疑兇會還手卻沒有：「我感覺佢動作好似又移前咗少少，跟住我受到威脅，我再打多下，佢又戇居居咁企咗係嗰面」，之後疑兇走到商場圍欄位置。
他提到，商場職員接著到場疏散，兩名見義勇為的市民協助為傷者急救，期間輝哥站在中間「望實」疑兇，恐防他會進一步施襲。
指疑兇突然「喊得好淒涼」輝哥：或可能覺得做咗啲唔啱嘅事
在雙方對峙時，輝哥憶述疑兇「唔知點解突然間會喊得好淒涼。我唔知咩原因，可能或者我打醒佢，又或者佢自己覺得自己係做咗啲唔啱嘅事」。警方最終到場制服，輝哥亦離開現場。
輝哥提到，整個對峙過程和疑兇未有言語交流，亦沒有直接眼神接觸。他直覺「眼神如果集中望實一樣野，係會好挑釁佢，唔係一件好事」，故只集中留意疑兇的行動。他又稱當刻未有留意疑兇的精神狀態：「我冇留意咁多嘢，我望住佢手上嗰把嘢，我好驚嗰把嘢大佬，12吋長。連前面訓喺地下嗰個我都見唔到，我理論上係冇可能見唔到，因為我助跑過去時其實（會經過），可想而知當時我情緒係幾緊張…我好驚。」
網上圖片
輝哥：我淨係想阻止佢唔好傷害人
談到為何挺身而出，輝哥指當時未來得及思索：「當時我第一反應係：『我淨係想阻止佢唔好傷害人，其他咩原因都唔理』……我連『諗驚』都冇乜時間畀我諗。」選擇圓凳作為「武器」的原因亦很簡單，就因為附近沒有更好選擇，他坦言不知道圓凳能否保護自己：「唔通我用隻手⋯大佬我冇受過訓練㗎嘛。」
透露被家人「鬧到飛起」
經歷了一晚驚魂，所幸輝哥的情緒未有大受影響，事後重返現場上班也未有問題：「其實呢件事情已經完結咗、處理咗，生活照舊係咁過。」
輝哥指昨晚12時半完成落口供程序，回到家後已倒頭大睡。他透露事後被家人「鬧到飛起」，家人罵他「衰人！你顧下我先得。」若將再有類似事件發生，輝哥坦言不能斷言仍會挺身而出：「我唔知，或者我唔會再有呢個膽量做第二次，我上咗年紀喇」。
獲封英雄 輝哥：不理會別人看法
事後輝哥獲網民譽為「英雄」，他則表示不會理會別人看法，「最緊要我做咗我想要做嘅嘢⋯⋯我唔鍾意佢傷害人、我想阻止佢。網民對我話我做得啱與唔啱、話我唔保護自身嘅，我唔理佢。」
對於當時未有其他市民加入協助，他希望市民體諒當時情況，「嗰把刀實在太長，係人都驚。你要理解呢樣嘢，唔好怪邊個，冇人要怪。」
目擊店員指見疑兇以刀不停刺向受害者 與同事匿藏休息室
在事發地點附近、「韓印紅」店員則向《獨媒》表示，當時她正在收錢，突然聽到外面「有人叫」；她好奇之下查看，看見疑兇正在地上不停用刀插向受害者，頓感驚恐並馬上與同僚躲進員工休息室。待外頭變得平靜，她看見疑兇正持長刀，站在圍欄旁一動不動，地下則躺著兩名受害人。
