【獨媒報導】立法會換屆選舉月中進行投票，港台今早舉行新界西北地區直選論壇，民建聯周浩鼎和實政圓桌田北辰爆發罵戰，周浩鼎不滿田北辰沒有聯手「攻擊」新思維黃俊瑯，只向自己提問，斥田北辰是二五仔，更指對方在2019年「黑暴」期間「搞警察」，「你搞警察我都未同你計數！」
周浩鼎：新思維是非建制攬炒派
在送禮環節中，周浩鼎對黃俊瑯送上「思維剖析圖」，斥新思維為「徹徹底底非建制攬炒派」，實為舊思維、假思維、呃人嘅思維和無思維，「新思維根本搞搞陣，拖跨政府，呃人！」
田北辰亦針對黃俊瑯，向對方送上「一腳踏兩船」的裝飾，不滿對方自稱非建制派，卻又和行會成員湯家驊「拍拖」，「仲建制過我，當香港人傻㗎咩！」他質疑對方原欲參選九龍西，最後卻空降新界西北，「擺明當我哋水泡」。
黃俊瑯諷周浩鼎自恃黃馬褂「唔同市民負責」
黃俊瑯則對周浩鼎回禮，向他送上黃馬褂，形容對方為電影《九品芝麻官》中的常威，自恃有黃馬褂便不用向市民負責，「你唔同市民負責，你一樣會受到報應！」
在自由辯論環節中討論當區的棕地問題，黃俊瑯率先發難，七情上面炮轟田北辰，在任職九鐵主席、扶貧委員會和立法會議員期間，未有解決貧窮及交通擠塞問題，「鐵路小組主席做咗咁多年，屯馬線咪又係大家塞車。」
田北辰一句「答非所問」激嬲周浩鼎
田北辰一度未能反應過來，及後才稱「有無見過一個咁厚面皮嘅候選人，九唔搭八，答非所問，你係無料㗎啦，算啦唔問你啦。」
田北辰及後再問周浩鼎，如何能做到釋放土地之餘，不會被指官商勾結。周浩鼎認為重點應是做好規劃，指交通配套措施不足，建議新增屯門碼頭渡輪班次前往中環。田北辰及後稱，對周浩鼎的答案感到失望。
周浩鼎發火斥田北辰為騎牆派
周浩鼎即時不滿，老羞成怒斥「你唔好講答非所問啦田北辰，我真係一條問題都唔再答你，因為你做二五仔！田北辰做二五仔，今日有個敵人非建制，你唔去問佢，你花時間嚟搞我，你幾次論壇都係咁，我今日揭穿你，你騎牆派二五仔！黑暴個陣你已經做過二五仔，你好多前科，你一個咁嘅騎牆派二五仔！黑暴嘅時候你搞警察我都未同你計數！」
周浩鼎又斥黃俊瑯提出重啟政改，是將香港再次推到政治漩渦，「佢（黃俊瑯）算衰，你（田北辰）都一樣咁衰！你上次不斷話要搞重啟政改，你係幫兇，關鍵時間做二五仔！你關鍵時間做二五仔，搞返自己人，太無品！騎牆派二五仔，我今日揭穿你真面目呀！田北辰！」
田北辰喚周浩鼎不要勞氣但不果，周浩鼎稱有不少市民喚自己揭穿對方的真面目，「嗱，我話畀你聽，點解佢要講民生議題，因為佢要用嚟遮掩佢做二五仔嘅醜陋！」黃俊瑯一度偷笑稱，「建制派唔好嗌交，我嚟調停下。」
田北辰否認騎牆：我企喺道理嘅牆
對於騎牆的說法，田北辰表示，「我道牆叫做道理，我企喺道理嘅牆」。周浩鼎叉腰稱「真係好笑啦，我未見過人咁唔知醜，騎牆仲話道牆係道理，哇，真係！」他更稱田北辰為「田二五」。
黃俊瑯再問田北辰，是否支持譴責林鄭不予港人普選，田北辰在捱打下稱「通常個個都話我錯嘅時候，我就知我做緊啲嘢係啱。」周浩鼎大叫，「唉喲，你真係好唔知醜啊！」田北辰反問黃俊瑯是否支持人大8.31政改，黃俊瑯表示支持，「你支持？但你又同行會成員拍拖！」
田北辰及後認低威，稱只是衝口而出說「答非所問」，但周浩鼎不收貨，指應槍口一致對外，「你次次都係咁，走嚟搞你，我一個問題都唔答你，你無嘥我啲時間！」
田北辰三度認低威不果 稱上屆曾拍片撐周浩鼎
在論壇尾聲，田北辰再次重申並非針對周浩鼎，更指對方在2016年立法會選舉競選超級區議會向自己拜票，「我二話不說支持你，同你拍埋片，我田北辰又係以前嘅田北辰，又係今日嘅田北辰，點解你......」周浩鼎隨即發火，斥對方在2019年「搞警察」，「你依家同我講一樣？我真係今日都唔想同你計數。」
田北辰喚對方清晰交代「點搞警察」，周浩鼎只稱「你心知肚明啦」，並指屈穎妍所寫的文章「落井下石的人」正是指田北辰。田北辰最後無奈稱，自己只說中肯的說話，並指時任警務處處長鄧炳強同曾言處理手法和市民期望有落差。