【獨媒報導】去年《施政報告》提出郵輪旅遊經濟發展行動計劃， ，但就一直未見影。文化體育及旅遊局稱，將與《香港旅遊業發展藍圖2.0》一併公布。被問到新加坡在今年7、8月的郵輪數目較本港多，文化體育及旅遊局局長楊潤雄認為，不適宜直接與新加坡直接比較， 因本港5至8月踏入風季，航班在安排上不會冒險：「譬如好簡單，點解我哋話9月踏入一個旺季呢？因為傳統以來，過去喺5、6、7、8月開始，我哋都會有啲風季影響。呢個有啲地方係無。」
楊潤雄今早出席港台節目《千禧年代》，再次被問及郵輪旅遊經濟發展行動計劃。主持指去年《施政報告》已提出透過在客源市場創造需求、發展郵輪旅遊產品、強化啟德郵輪碼頭周邊配套。楊潤雄表示，政府今年花了不少時間與業界商討、吸取其他地方的經驗：「其實我哋都有個行動計劃，初步已經做咗出嚟。但同一時間，你都知我哋做緊旅遊業發展嘅藍圖2.0。」他稱在公開諮詢期間發覺，「郵輪業會係為旅遊業其中一個重要嘅部分」，所以較適宜一併公布。
楊潤雄（資料圖片）
楊潤雄：相關工作無停過 訪港遊輪已較去年多
不過，楊潤雄強調，當局一直未有暫停推廣旅遊業的工作，包括參與國際郵輪展覽、會議，及聯絡不同郵輪公司：「吸引佢派啲船嚟香港，當然有兩個層次啦，訪問香港呢度停一日、兩日，啲遊客可以上岸去玩啦。」另一類則是吸引對方以香港為母港，即起點站及終點站，楊潤雄再三重申：「喺呢方面嘅工作，過去一年都無停過，個結果都唔錯。」
楊潤雄表示，今年訪港的遊輪已經較去年多，並與疫情前相若：「嗰個航班嘅次數亦都唔少，亦都比舊年多，會繼續從呢個方向繼續去努力去做。」然而，主持再問到本港將進入郵輪業旺季，今年派船來港的郵輪公司達30間，較去年的18間上升六成多：「有時個數字都未必同自己，香港前一個時段，同宜家比。譬如同新加坡比，就算喺7、8月淡季，其實都話7月中去到10月，都有47架郵輪抵達同出發。哇，如果同香港比，就多過香港七成幾。」
資料圖片
指本港有風季 郵輪航班安排不會冒險
被問到與其他地方相比，來港的郵輪是否「都真係差一啲」，及以本港作母港的郵輪同樣不及其他地區。楊潤雄稱，因為本港5至8月踏入風季，所以不適宜直接與新加坡相比：「譬如好簡單，點解我哋話9月踏入一個旺季呢？因為傳統以來，過去喺5、6、7、8月開始，我哋都會有啲風季影響。呢個有啲地方係無。」
楊潤雄進一步解釋，「有時我唔係講話7、8月有幾多風」：「而係因為傳統係風季，啲航班安排上係唔會冒險，佢唔會嚟，所以我哋係有少少淡旺季之分，有啲地方可能無乜淡旺季之分。」他同提到部分地區發展較早，所以有較多航班前往，本港難以直接比較：「我哋自己要做嘅呢，就係充分利用我哋自己優勢。」他認為，香港在亞洲地區屬「好方便嘅城市」，在高鐵、機場有交通上的便利和吸引力。
資料圖片
盼善用郵輪碼頭空間 配合青年驛站、啟德體育園產生「片區效應」
主持再次質疑，《施政報告》同提出提升會議展覽及活動場地的功能：「但呢個唔係正正就係不嬲，當日起郵輪碼頭嘅時候，已經考慮到淡旺季，會用到佢入面場地用展覽活動，當日已經有呢個功能，過咗10年有多，其實有咩分別，點樣提升？」楊潤雄就稱社會近日有不少討論，「郵輪碼頭好靜喎」，當局因此從另一角度研究，如何能善用郵輪碼頭的空間，「或者再做得旺啲」 。
然而，楊潤雄稱郵輪碼頭主要用作泊岸、上落客，本身的商業面積甚少，附近地皮用作興建商場、酒店，近年則有所改變例如已興建住宅，並強調不應與尖沙咀比較：「大家好容易同尖沙咀比較，點解另外一個郵輪碼頭一上嚟就成個，好多購買或者零售、食嘢比較。」他希望能善用郵輪碼頭的空間，例如改造天台，加上「片區效應」，即啟德社區隔離設施改建為「青年驛站」，及啟德體育園的落成，將對整個地區的氛圍都有幫助。
資料圖片
賽馬旅遊放寬年齡限制？ 楊潤雄：要詳細考慮
談到《香港旅遊業發展藍圖2.0》，楊潤雄稱要發掘香港特色的景點，突顯本港特色從而吸引旅客，並帶動經濟，並認為要與其他行業合作，包括零售業推出具香港特色的產品。他表示，旅客青年群的消費模式已有所改變，「都係要多花心思先吸引到佢哋消費」。
至於推動賽馬旅遊，有媒體引述消息指當局或會拆牆鬆綁，放寬進入馬場的年齡限制。楊潤雄稱，當局曾與賽馬會商討，希望對方好好利用其特色：「賽馬喺個區域裡面做到我哋嗰個規模，同埋嗰個情況，都唔係咁多搵得到。」
他指香港每年有很多國際賽事，可以吸引到很多外地馬匹、馬主或喜愛該運動的人來港，需要充份利用特色。對於是否取消年齡限制，楊潤雄就稱要詳細考慮：「我哋整體去睇啦，所有嘢都唔可以話毫無限制，有啲嘢都係要睇返實事求是，有啲嘢需要設限都係要設限。」