（獨媒報導）區議員宣誓在即，逾200名民主派議員辭職，單是葵青區便有18人離任。剛接任葵青區議會主席的梁錦威，另有去年六四集結案的官司在身，他有機會是任期最短的主席，一上任便開始倒數。梁錦威一身全黑接受獨媒訪問，他的眼鏡、T-Shirt、長褲和波鞋都是黑色。原來他自前年7.21元朗恐襲後，便由頭黑到落腳，「我以前習慣會著白色衫，同都會襯吓衫，但7.21之後你都知咩事。」
從政十年 大學畢業後加入街工
梁錦威本身是葵青區議會審核委員會主席，民主黨單仲偕涉前年10.1案，被判囚14個月，緩刑兩年，及後辭去主席一職。這位一身黑衣的新任區議會主席，其實亦已從政近十年。
於浸大中國研究畢業，梁錦威做過學生會評議會，第二年任評議會主席。剛好學生會出缺，便兼任署理會長，代表浸大到學聯開會，那時正值學運低潮，談的是2007和2008年雙普選。如今重看，已遙遠無比。
「如果唔係做勞工團體，我估我會去教書。」身邊有不少大學同學投身教育，梁錦威原本打算畢業後做基層運動，在讀書期間接觸最低工資和紥鐵工潮，認為基層工作十分有意義，「你問我有無好深印象畫面，其實又唔特別多。」
最後入職街工，出任前葵青區議員黃潤達的助理，又做過勞工幹事。他性格內斂，不喜歡走得太前，亦不愛接受訪問，自言從沒有想過要參選區議員，直至2011年葵涌邨選區一拆二。他在翌年參選一擊即中，並連續兩屆連任至今，剛好接近十個年頭。
反送中衝擊原有做區方式 非否定過往工作
梁錦威原本的想法是只做兩屆區議員，「一個人坐一個位係唔應該坐咁耐，應該俾其他人試吓。」他認為新人才會有新衝擊，「我無諗過做一世。」然而，做區議員總有麻木的時候，他承認，一直以來是較傳統的街工做區方式，「我以前都唔介意話自己係一個區佬，但都會做政策倡議。」
直至爆發反送中運動，梁錦威開始質疑，過往的居民組織未能令街坊政治化，「有啲識咗10年、8年，然後發現佢哋係藍嘅，老實講都幾大衝擊。」
他反思是否有些地方出錯，街工強調和政治掛鈎的基層權益，卻未能完全深化街坊。梁錦威提到，有些認識多年、一起爭取在職家庭津貼和低收入津貼的街坊，在見官時能滔滔不絕，但卻對當前的政治環境沒有「感覺」，「佢哋覺得班後生係暴徒，搞亂社會。」
自反送中後，梁錦威已沒有再開組、和街坊砌政策，「你話同街坊傾完，然後見羅致光爭取職津，我已再接受唔到咁。」記者不禁問道，「你即係否定咗多年來的工作？」
梁錦威不認同，但認為如繼續停留於這些工作，已不可能改變現時的社會，「你依家面對嘅係乜嘢政府？已容納不下異見，再進入政策討論係不合時宜，我要強調，唔係要否定基層團體的努力，但我自己唔會再想做。」
去年六四悼念晚會被禁，支聯會主席李卓人等手持燭光走入維園，事後被控煽惑他人明知而參與未經批准集結。
支聯會大佬入獄 被迫越走越前
政治啟蒙是八九六四和零三七一，中六首次參與維園悼念晚會，同年50萬人上街，梁錦威形容，都是理所當然地參與其中。當選區議員前，他一直是支聯會義工，當選後辦事處立刻加入支聯會，他認為有條件和空間做多少少，「同街工無關，係自己決定。」
梁錦威的另一個身份，是支聯會常務秘書部召集人。支聯會一眾「大佬」身陷囹圄，主席李卓人、副主席何俊仁因另案入獄，秘書蔡耀昌亦一度要還柙。梁錦威被迫走得更前，他其實不太習慣應對傳媒，「唔鍾意高調，但去到嗰個位都係要做吧。」
離別，補位盡做，這應該是大時代下的寫照。
「支聯會最重要就係每年搞到六四集會，俾市民繼續悼念到，呢個就係最重要。」在風雨飄搖的日子，回望過來，似乎更感到維園晚會的重要，「你經歷過2019年到今年，嗰個重要就出嚟了。你唔再悼念（六四），可能以後都唔會再講，啲嘢可以無得好快。」
今年六四維園晚會再被禁，梁錦威、蔡耀昌及盧偉明當晚以個人名義，於香港大學國傷之柱悼念。
支聯會的意義——有系統地繼續紀念
維園悼念晚會連續兩年被禁，六四紀念館同遭食環署掃場，支聯會何去何從？有建制派表明只有解散或取締。梁錦威指支聯會在97回歸和03年《基本法》第23條立法，已有心理準備，將不能再公開悼念六四，「其實一路都預期會打到嚟，呢個都係當初做公司註冊，而唔係社團註冊嘅原因。」
「支聯會有個好特別嘅地方，就係唔係咁易畀出面嘅說話影響到」，「2014年雨傘，如果無經歷過，或者好多當年小學生、今日係手足嘅都好矇糊，正正係因為無一個有系統嘅組織，keep住將呢件事繼續講、繼續紀念，真係可以好快就丟淡。」
「六四唔單止係悼念，仲提醒緊共產政權嘅本質係乜，佢真係一個殺人政權，唔好旨意喺佢管治下，會有民主自然出現。」
八年前已「離開」街工
三年前勞工組事件，街工爆出退會潮。梁錦威是默默付出的人，他早已沒有續會街工，只是沒有宣之於口。「街工做嘅嘢同我嘅想像，係有一定落差。大家想像出嚟嘅街工，一定係美好，有左翼諗法，會做最接地嘅嘢。」他認為每日的工作枯燥，但街工令人相信是為了美好的將來鋪路。「我到今日都無否定，基層當家作主呢一套，但街工嘅營運模式係發生唔到。」
早在2013年，梁錦威其實已「離開」街工。退會因為人事問題，他當時一直和黃潤達合作，所以沒有高調對外表示已退出，「唔想令到佢哋好困擾，同要啲嘢分開做吧。」
指重奪區議會具意義 社區參與撥款推新嘗試
愛國者治港，區議員要宣誓，《蘋果日報》停運，李家超上任政務司司長，山雨欲來風滿樓。回顧本屆區議會過去近一年半的日子，梁錦威有一番看法，認為民主派昔日同曾是少數，「你以前都係可以照講照表態，但都唔會過到，啲錢又唔輪到你分配。」
他強調重奪區議會有其意義，指社區參與撥款的運用，便能作很多嘗試，「立法會反而無實質資源，但區議會就可以做好多嘢，例如基層教育、性別平權工作，呢類都係可以用區議會撥款做到，重奪區議會係有意義。」
「當然政權可以下年就cut晒你資源，但佢做到一早做咗啦。呢兩年有幾千萬用喺社工，實踐過去建制派當道唔會做嘅嘢，呢個就係區議會最有價值嘅嘢。」
前年反送中運動浪潮下，民主派於17個區議會取得主導權。隨之而來的是，民政處動用《區議會條例》第61A條，禁討論政治議題，並多次拉隊離場，這一切已成為常態。梁錦威倒自詡阿Q，「過往民主派都係要硬食，被支持政改同一地兩檢，依家咪大家都攞唔到『區議會同意』囉。喺我角度，其實差唔多。」
梁錦威預計，下屆參選區議員將同須取得選舉委員會的提名，不然將無法入閘，「到時咪唔洗DQ，只需要控制到選委會，呢個已經係基本劇本。」
民主派大舉撤出，區議會看似時日無多。訪問其實早在5月進行，但形勢急轉直下，當拘捕員工的風聲傳出，《蘋果日報》一星期內結業；區議員宣誓傳出如遭DQ，便要償還薪津，迎來雪崩式辭職。梁錦威當時認為「驚唔到咁多」，時勢艱難更不應自我設限，作為從政者更應警惕，不然長此下去將沒有人願意發聲，「嗱，我要強調，唔係想批評人辭職，但如果開始就為自己劃條紅線，政權冇講紅線係邊，而我哋就自我設限。你一估條紅線喺邊，即係已經同自己劃咗限制。」
入獄始思考未來路向 考慮開黃店連結社區
去年六四集結案的同案被告，黃之鋒、岑敖暉、袁嘉蔚和梁凱晴早前已認罪，分別被判囚4至6個月，梁錦威預計自己的刑期為12至18個月。他坦言，入獄後才開始思考未來路向，包括社運參與形式、個人生活，更有熱心的朋友介紹工作給他。
「哈哈，未有咁快嘅。」梁錦威表示，目前只能見步行步，「真係入去坐？我無咩感覺，咪準備定眼鏡同鞋囉，國安嚟到都唔駛怯吖嘛。」
「自己社區自己救，唔可以再依靠議員。」梁錦威有想過如遭DQ和出獄後開黃店，例如涼茶舖，又可以替街坊申請生果金、吹水，「始終想做社區結連嘛。」
在首次上任主席的會議尾聲，梁錦威呼籲各位議員珍重，「好人一生平安，香港人加油」。他同時表明，已有心理準備今日是最後一次會議。在會議完結後，8名出席「最後會議」的民主派議員合照留念，並高呼「大家頂住」。
記者：麥馬高