（獨媒報導）《立場新聞》涉嫌發布煽動性文章，前總編輯鍾沛權及署任總編輯林紹桐今日在區域法院，被裁定串謀發布煽動刊物罪名成立。對於法庭已就涉案文章裁定具煽動意圖，警方會否就撰寫文章的記者、博客作調查及進一步行動。國安處總警司李桂華表示，會視乎文章是否有煽動意圖：「就作者，同埋嗰啲負責寫嘅人士，我哋會睇睇一樣嘢，佢哋有無煽動意圖做呢一樣嘢，如果有嘅話，我哋會同律政處商量，究極適唔適合檢控嘅情況。」
在鍾沛權步出法院後，李桂華就案件裁決見記者，他在開場中稱，控方在57日的審訊中展露不同證據，可見三名被告透過報道、博客及專訪，在2020年7月7曰至2021年12月9日期間，發布帶有煽動性的文章，當中包括污衊國安法及其執法行動、煽動離叛，散布分裂國家的訊息、鼓吹推翻政權、乞求外國向香港及中國政府進行施壓作制裁行動，更透過反政府議題推波助瀾，挑起公眾向中央及特區政府的仇恨。
《立場新聞》前總編輯鍾沛權
重申自由非絕對 如涉國家安全可施加規限
李桂華特別提到，警方在2021年12月29日執法行動時：「有啲人不分青紅皂白，話我哋打壓新聞自由、言論自由嘅。」他表示，法庭判詞告訴外界，警方執法行動的理據，又引用《公民權利及政治權利國際公約》：「呢一類嘅自由並非絕對性嘅自由，如果遇到一啲國家安全，公共安全、公共安寧、公共秩序嘅情況，係可以施加一啲規限嘅。」
另外，李桂華亦不點名提到早前英國的示威，正因為假消息、煽動性消息在網上流傳，影響社會秩序、穩定，甚至影響國家安全：「其實呢啲事喺2019年、2020年，我哋都係歷歷在目。」
李桂華：非首次旁聽國安案、有時間便聽審
《無綫新聞》記者關注，「屠龍案」6名被告經審訊後罪名不成立，及李桂華為何親自到區域法院旁聽：「點解你要親自嚟到區院呢度聽呢？係咪因為涉及一啲指控話，新聞自由你哋唔認同呢？」
李桂華先強調，早前已有7名同案被告認罪，重申十分重視同類案件，呼籲公眾如有相關消息可報警：「呢個案件係一個好嚴重嘅案件嚟，真槍，甚至有長槍，有炸藥，佢嘅炸藥嘅份量可以造成好大嘅死傷，包括警務人員，或者係參與當時遊行嘅人，或者無辜嘅人士，又有一個非常之完整嘅計劃。」
對於是否因涉及《立場新聞》便首次旁聽，李桂華就稱並非首次聽審：「當然我唔能夠每日都嚟啦，但係如果呢啲咁嘅案件，我除咗我同事向我報告，睇一啲文件向我報告，我係非常之如果有時間嘅話，都會抽嚟聽一聽究竟案情係點。絕對唔係話我第一次聽國家安全有關嘅案件。」
裁決影響新聞自由？ 李桂華：更好讓外界明白違法界線
另一記者問及，坊間有聲音認為裁決影響新聞自由及言論自由，李桂華就稱「用好快嘅時間」看了裁決，認為可更好讓外界明白違法界線，即只要涉及煽動性物品便有機會干犯相關法律：「我哋唔係話，有咩題目唔報得，有咩案件唔報得，只不過佢選擇用一個煽動意圖去報道嘅做法，即係一個載體用嚟散播煽動意圖嘅訊息，呢個就唔做到，會受到法律制裁。」
日本共同通訊社則問李桂華，今次裁決對外國媒體在香港採訪自由你影響。李桂華回應時稱：「唔應該分外國媒體、本港媒體，其實我哋嗰把呎、個法律都係用嗰一樣嚟。」他重申今次案件涉及煽動意圖，《刑事罪行條例》、《維護國家安全條例》均清楚列明，甚麼情況屬煽動情況：「大家返去睇一睇，一般人係唔會犯呢啲！」他表示，涉案的17篇文章的題目，「其他報章、其他媒體都有買㗎，點解佢偏偏係會被人拘捕呢？因為佢係用咗嚟做煽動意圖嘅嘢。」