二零二零年，入秋，街上死氣沉沉。掃一掃電話，突然留意到唔同地區紛紛出版社區報，都有九份十份。係噉咦揀咗一兩份嚟睇，一路睇一路會心微笑︰「原來仲有咁多人關心香港！」
我對區報有一份獨特感情！屋企喺油麻地，早喺二零一二年已收到人生第一份區報——由「活化廳」出版嘅《活化報》。份報大大份，內容圍繞住區內「人、物同故事」，包括街道店鋪史、社區新聞同街坊心聲，就連芝麻綠豆嘅事都會報道。紙質粗糙單薄，最深刻係報紙嘅油墨味；早期得黑白灰三色，後來先多返少少色彩；設計簡約，排版唔算精美，手寫嘅篇幅相當多；內文好多常用口語，又有啲手繪插畫，拼拼貼貼就成形。而《活化報》雖然精簡，但精簡得嚟好「真」！最驚喜嘅係，報紙嘅製作班底，原來係一齊喺社區生活，仲要係我都認識嘅街坊朋友。喺自己生活成長嘅社區，睇返自己區嘅報紙，特別親切留神。因為《活化報》，社區事變成個人事，社區嘅人亦都變成我要去關心嘅人。
後來《活化報》停刊，我有些少失望，以為再睇唔到社區新聞。點知唔使好耐，又出現咗一份叫做《油樂園》嘅區報。《油樂園》封面話自己係「一份連絡教會同油麻地的社區報」，相信係由一班基督徒製作。除咗有一般嘅店舖介紹、地區歷史，人物專訪之外，每期仲有一篇專題文章，以基督教嘅價值同一啲社區現象「對話」，用佢哋嘅講法，係想為紛擾嘅社區透出永恆嘅小小微光。借助詩人同哲學家嘅靈性，去構造一個更賞心悅見嘅城市。但可惜，《油樂園》出版咗十一期就停刊。
之後，間唔時都有組織派發啲夾雜社區地圖同資訊嘅小冊子，但都係一次起兩次止……
一眨眼，到咗二零二一年，估唔到因着社會運動嘅張力同武漢肺炎嘅襲擊，呢個社區各方面嘅生活形態都出現咗大變，突然之間，香港人好似入咗監獄同醫院噉。呢一刻，不安嘅繼續不安，被困嘅繼續被困，橫死掂死，唯有好好活着，好似林夕噉講，只能「拼命無恙。」
望住過往咁多份地區報，心諗不如再搞返份啦，結果，就出現咗眼前呢份《油佐小報》。《油佐小報》，望個名就知，係屬於油麻地同佐敦嘅報紙，名字好平凡，只因實在諗唔到點樣同音食字語帶雙關。但錯有錯著，名字嘅平凡一如社區，希望大家可以喺平凡之中，重新認識、發現同編寫獨特嘅社區故事。
「留一口氣，點一盞燈，有燈就有人。」《一代宗師》有葉問，油麻地、佐敦以至香港，有你同我，將社區故事承傳落去。
