相信好多人會好奇一個香港區議員點樣喺烏克蘭打仗期間，去當地做義工幫手搬搬抬抬，所以就寫篇文記錄下自己的行程吧。
背景
2014年廣場革命中，希望加入歐盟的烏克蘭人民成功推翻了親俄政府，自此以後俄羅斯就公然吞併了克里米亞，並暗中支持頓巴斯的分離份子，推翻了自1991年烏克蘭獨立公投的公認邊界。其後德國、法國同白羅斯三國協調下，俄烏曾一度按《明斯克協議》停火。但後來到了2022年2月中，俄調往邊境的軍隊無預警進入烏克蘭領土，並開始了包括對民居的狂轟濫炸。
我喺嗰個星期睇新聞睇到周身唔舒服，捐錢去人道救援組織嘅同時，又聯絡咗斯洛伐克啲朋友睇下佢哋有無其他途徑可以幫到手。引用佢哋原話 ，”The war is so f*cking close” ，其中一位朋友所住嘅村，距離烏克蘭不到40公里，大概就是我選區西貢北同屯門之間的距離吧。後來經他們轉介下，認識了非牟利組織Pomoc za čiarou / Допомога за лінією 的負責人，佢名叫Matúš。
到了10月，我告知那位非牟利組織的負責人，香港政府終於放寛0+3隔離政策，我終於可以前往捷克、斯洛伐克以及基輔。Matúš聽罷就話可以載我去基輔，事就這樣成了。
啟程前往東歐
11月15日開完最後一個區議會委員會，當晚就刻去赤臘角，經伊斯坦堡轉機到布拉格。之後喺斯洛伐克逗留左一陣探完朋友，就跳上架Flixbus直到波普拉德。
其實根據目前戰況，前往烏克蘭並不困難。現在烏克蘭只閂咗俄羅斯和白俄羅斯嘅邊境，其他仍然是開放緊。持香港特區護照者可以14天免簽證喺烏克蘭內逗留，從波蘭入境都無唔需要太多時間檢查行李。不過都係有當地人帶路比較好，以便翻譯同應付突發事件。同埋千祈唔好抱住普通放鬆去旅行嗰種舒適嘅心態去，否則恐怕你會失望。
工作
於是，我們便到達烏克蘭。凌晨4點，喺利沃夫接咗另外幾位烏克蘭嘅年青人上車，就繼續駛向基輔。當時烏克蘭連續四週大雪紛飛，睡眠不足又無未食早餐嘅我哋﹐早上因為中途主幹道撞車而塞咗幾個鐘車。睇來塞車並唔係西沙路嘅專利，我都理解到點解俄軍裝甲車去年3月時會用堵塞去基輔嘅路作為戰術。另外，其實落雪都係件好事嚟，因為俄軍用唔到啲伊朗無人機來炸啲發電廠。最後我哋決定去油站買早餐和去廁所，然後行第二條路。
我哋去到霍斯托梅利（ Гостомель）運送物資，並順便影當地家鄉情況俾離開咗當哋嘅烏克蘭朋友睇。呢度係俄軍一開始打仗由白羅斯進攻嘅地方，位於基輔北面郊區，當時由車臣嘅私人部隊同俄羅斯特種部隊空降霍斯托梅利機場，同駐守嘅烏克蘭軍發生咗激烈嘅戰鬥，以致呢一帶附近房屋都被摧毀，我朋友屋企比較幸運仍然健在。但自從3-4月烏軍擊潰俄軍之後呢一帶嘅戰鬥就結束咗。直到而家仍然見到燒焦的車同坦克被人遺棄喺路邊。
去完市郊之後就返去市中心送物資，經過檢查站果陣士兵檢查過我哋嘅護照就放行。喺基輔影嘅相唔算多，一來係因為行程緊湊，二來係因為戰時本身對攝影有嚴格嘅限制，主要係驚間諜同情報外流。我朋友同我講切記唔可以影烏克蘭士兵、部隊、檢查站嘅相。但當我途經影一幢建築物嘅相嗰陣，我依然被截停問話、同埋要求刪除照片，深深感受到戰爭時氣氛緊張。去到市中心某個位置，我哋冒住雪幫手搬嘢去果度嘅物資中心同埋俾負責救援嘅醫生，總算搞掂手頭嘅工作，可以四圍行下記錄下。
戰時記錄
我哋住基輔一個單位，由門口經大堂行去五樓單位全程都係摸黑咁行，不過幸好電梯仍然運作。但由於空間有限，所以我哋就讓女士搭電梯，然後攞行李摸黑行上5樓，好彩太陽未落山，仲有啲自然光照明。比較幸運嘅係，我抵達時啱啱好有熱水供應，因此可以沖個熱水涼，人在戰爭中國家連沖個熱水涼都唔係好似平時咁理所當然。供電時間係按情況早上4個鐘、下午4個鐘，都要捉緊機會將手機叉滿電。就算出街食飯，好多情況餐廳都因為停電而無熱食提供。
做正事之後，我路過聖米迦勒金頂修道院，嗰度有一排藍色嘅牆，上面貼滿左自2014年克里米亞被吞併開始而為國捐驅嘅人嘅照片，一幅牆有幾百張，而有連續十幾幅牆都貼咗相，實在令人唏噓。我嘅朋友敦促我一定要同香港人講呢件事。另外一座蘇聯時期建成、象徵烏俄兩族之間共融嘅友誼之拱，亦喺此次戰爭中被俄軍導彈炸出了一道大裂痕。
其中一晚我被朋友邀請去飲酒。由於宵禁令，以往通宵經嘅酒吧而家要喺夜晚10點關門。我酒量唔好，同其他斯拉夫人坐埋一檯飲酒實在係獻醜，對我來講酒精比俄軍更危險，佢哋仲開玩笑叫我去斯洛伐克電視台綜藝節目表演「一杯即醉」嘅特技。 其中一位烏克蘭朋友話俾我聽，佢哋同俄羅斯嘅恩怨已經至少一個世紀。佢覺得俄羅斯寫歷史嘅方法唔係靠軍事征服，而係靠篡改寫歷史書。舉個例子，烏克蘭總統澤連斯基提及嘅1933年烏克蘭大饑荒中，雖然烏克蘭係東歐糧倉，但係自從蘇聯共產黨於30年代清洗很多具技術嘅知識份子同地主，而農夫失去工作嘅動力同技術，因此導致蘇聯全國糧食短缺。當時史太林以俄、烏血濃於水為由，將大量糧食由烏克蘭運去俄羅斯，派兵禁止烏克蘭民眾私藏糧食同農具 。而嗰位烏克蘭朋友嘅祖父母輩正正經歷過呢一段歷史 。
結語
就係咁，我經歷咗呢個畢生難忘嘅旅程。身為地球嘅一份子，戰爭從來都唔係遙遠嘅事，例如東亞都有幾個未引爆嘅「炸彈」，只係今次係東歐果個爆咗，而我咁啱有能力去幫助別人嗰一個。親身去到戰場見過咩叫戰爭中嘅生靈塗炭，就會知道嗰啲身處喺太平盛世中支持武力解決問題嘅人係幾咁無知。我喺寫呢篇文嘅時候睇到新聞，俄羅斯官方承認本土嘅軍事基地同機場被烏克蘭成功攻擊，我諗烏克蘭係世界嘅支援下收復失土嘅日子都好接近。就好似蘇聯係我出世嗰陣已經係歷史，克里姆林宮老海鮮嘅野心同我哋呢個時代已經毫無關係，我由衷敬佩烏克蘭努力擺脫緊蘇聯嘅陰霾。
（本網歡迎各界投稿，文章內容為作者個人意見，並不代表本網立場。）