本人於4月面試小念頭該店旺角店茶藝師職位（相當於水吧兼樓面），面試時介紹工作內容係調配飲品。 雖然人工唔高，但係應該都學到嘢，點知實際工作大部分時間都係洗碗同清潔，如是者工作咗一個禮拜，認為呢份工始終唔適合自己，於是係5月11號辭咗職。
辭職後一直未出糧，從來都無諗過自己會比人拖糧，完全唔知可以點做！
於是向朋友講述。朋友聽完嘅意見係，5月11日為最後工作日子，僱主理應係工作完結後7日內出糧，即係5月18日。
我開始懷疑對方有心拖，其實5月19號雇主曾經用WhatsApp聯絡過我，索取轉數快號碼作支付薪金用途，但係一直冇任何消息，於是喺朋友意見下用whatapp再作詢問，但僱主當日未有作回覆，於是隔日再次詢問，但對方回覆答案竟然係「我話出返果幾日糧俾你，唔係果幾日出返份糧俾你」，仲同我講如果真係有金錢需要就上去中大分店攞，同時又承諾會係嗰個星期內出糧（5月22號前），聽完我唯有等佢真係呢個禮拜出糧俾我，因為我根本冇喺中大分店返過工，去中大出糧唔合邏輯同埋未必會順利，甚至白行一趟，我冇咁嘅責任配合對方。
而結果就係喺6月13號之後對方仍然未出糧，我去左勞工處落案，同時搵勞工組攞意見。
當晚返到去就最後通牒小念頭，要求「立即出糧」！
對方收到訊息後用轉數快只支付咗部份薪金，追問下對方辯稱計少咗日並重新計算，但數字仍與實際不符，直到我向佢出示勞工處申訴書和正確計算方式後，對方才願意支付剩餘薪金。全程一句「對唔住」都無，正係同我講左句「學到野」！？
經歷28日欠薪後，終於成功追討，係追討嘅過程本人態度良好有禮貌詢問出糧事宜，但小念頭曾多番拖延無實際行動支付薪金，並不知意圖為何要求本人親到中大分店索取薪金的方式為難我。
至此事情暫告一段落，但根據法例和勞工處說法小念頭仍需向我支付欠薪期間的利息，而果26.5蚊要我大費周章行一堆法律程序，最後我選擇放棄。
另外想幫呢間店「宣傳」下，區區一星期薪金都要拖欠，令人需要浪費額外資源同人手追討本來應得嘅薪金，並且追討期間態度敷衍，就算係其他地方做得幾好都補救唔到。
小編：僱傭條例規定離職後7日內出糧，聽落好似基本保障，但啲老闆成日放到最後關頭先肯出，而勞工處一向以「調解」為名，「懶理」為實！
條例仲話遲出糧可以追埋「利息」，又有幾多個打工仔得閒去處理一堆法律程序？明明份人工係自己勞動嘅成果，所有野原本就係應得！呢堆法律程序基本上係懲罰打工仔。
所以被拖糧千祈唔好怕，因為自己唔反抗，外人好難介入幫手！
今次事主同佢友人都做得好好
假如身邊有朋友被欠薪，希望各位都可以鼓勵佢直接追討
（本網歡迎各界投稿，文章內容為作者個人意見，並不代表本網立場。）