創刊號終於派發哂，想喺度多謝各位大埔人嘅支持同鼓勵。
想同大家分享一件鼓舞嘅事，喺最後一日派報，啱啱搭正6點，我哋等緊成員運送嘅報紙，已經有位伯伯行過嚟問我哋：「係咪都等緊派報紙呀？」又問我哋係咪有得拎一份。佢真係望住電話準時係到等我哋！
感謝依位先生重視依份報紙。回想返幾個月前，當時覺得大埔咁好咁多嘢值得講，好應該要有份區報將依啲事報導一下，於是乎我哋開始搵有心嘅街坊籌備依份區報。
大埔人最團結最熱心。唔洗幾耐已有一班大埔人響應，願意落手搞依份社區報。由研究稿題、採訪、撰寫，到校對、排版、派發，幾經辛苦下由我哋成員一手包辦，希望將大埔交通規劃議題、大埔藝團、富善街歷史、大埔生活圈一一呈現俾大埔人，亦希望將抗爭者心路歷程，報導俾一班少接觸網上資訊嘅人士，打破同温層。
《埔報》會繼續報導大埔社區事，亦感謝各位街坊互相扶持，創刊號或有不足但會繼續加油，敬請期待下一期！
（尚有少量店鋪有存貨，歡迎各位街坊去索取❤️）