印尼門將Kurnia Meiga入選鈴木盃最佳陣容，呢位效力阿雷馬嘅球員一直被認為係印尼比較似樣嘅門將，印尼足球最失敗之處，就係多年來都出唔到幾多似樣嘅門將，其實Kurnia Meiga都唔係話咁穩健，好多時都會發呆輸啲唔應該輸嘅波，究竟印尼係咪冇好門將呢？我覺得又唔係嘅。
好似Kurnia Meiga入國家隊代替佢嘅踢阿雷馬正選嘅阿雷馬後備王門將Achmad Kurniawan咁，雖然30有7，身高只有175cm，從末代表印尼出戰，而且愈嚟愈肥，但尋晚場波神到爆炸，勇救超過5個險球，雖然肥肥哋，不過彈跳力幾好，反應亦好快，只不過有時動作比較騎尼，我甚至認為佢嘅撲救技術仲好過Kurnia Meiga，只不過年紀體型身高同出迎時間輸畀Kurnia Meiga。
我第一次睇佢表演係2011年阿雷馬對山東魯能嘅亞冠賽事，當時佢已經要站喺Kurnia Meiga嘅背後，因為Kurnia Meiga去咗印尼U23嗰面集訓，Achmad Kurniawan就暫任正選。開賽冇耐就佢一個低級失誤令阿雷馬先失波，之後佢上演連串騎尼動作，例如接應隊友回傳踢空氣搞到差少少擺老烏，接波及救波動作都同一般門將有分別，睇落似唔係踢開門將嘅球員去客串門將，五星體育直播旁述都笑佢業餘水平，但下半場中段所有山東魯能中龍嘅射門都畀佢救晒，去到最後旁述都要轉口風話佢反應極快。
不過由2011-12印尼超賽後佢嘅出場次數大大減少，唔知係咪咁愈嚟愈肥，但正好今年Kurnia Meiga入選印尼隊，Achmad Kurniawan先可以有咁多上場機會，好多球迷至發現原來佢都有返幾下，喺10月18日對佩斯巴嘅印錦賽事，佢作出過最少七次關鍵撲救，成為Achmad Kurniawan近年代表作，不過年紀問題，相信Achmad Kurniawan會繼續做後備或退役轉行。
呢位門將手腳騎騎尼尼，衰起上嚟柒過關家姐，勁起上嚟可以好鬼黐線，但離不開印尼門將缺乏嘅一嘢樣，就係穩健。而Kurnia Meiga本身係佢親細佬，不過兩兄弟球運、身型、人氣、人工都差好遠，阿哥踢波末必好過細佬，又一例子。