上年亞運會男子籃球賽，蒙古成為一支奇兵，大家細心留意下，至知蒙古有一個半職業聯賽（因為冇乜人會主動留意蒙古籃運），但大部分球員需兼職維持生活。完成亞運會神奇之旅後，有蒙古媒體對蒙古籃運作出評價，指蒙古籃運有條件發展職業聯賽，因為唔會好似11人足球咁受天氣影響。
講得冇錯，蒙古足球加入國際大家庭後，面臨嘅最大危機就係天氣，適合戶外體育嘅月分唔多，冬季時有暴風雪，例如2003年蒙古國家隊來港參加東亞盃外圍賽前正好受暴風雪影響集訓。
即使蒙古足協推行蒙古超級聯賽，亦有球隊請職業外援，各項硬件設施有改良，政府亦興建仿真草場，但呢個超級聯賽同職業依然差得遠，絕大部分球員都有正職或者係學生，想踢真正職業足球，唯有出外。
今年25歲嘅蒙古前鋒Murun Altankhuyag（麥雲）就成功衝出蒙古追尋足球夢，於美國留學時曾踢大學聯賽，雖然要工作及返學好難專注足球，但美國大學球隊嘅專業規模足以遠勝蒙超聯，更令佢下定決心做職業足球員。
結果機會到來，2013年泰國甲組球會Krabi FC（卡拉比）與麥雲簽2年約，雖然今次簽約分明係同商業合作有關，但能夠令麥雲成為蒙古首位職業足球員，不是雙羸嗎？於卡拉比嘅首季，麥雲都係後備上陣居多，次季就被借去乙組Satun United（土星聯），但出場次數比泰甲時更少，完成泰國之旅佢就立刻飛去塞爾維亞加盟甲組球會Macva Sabac（沙巴斯）繼續足球夢。
與職業足球員擦身而過嘅蒙古足球員仲有高佬Bayasgalangiin Garidmagnai（哥域馬尼），呢位球員身高近米九，外貌十足拉高版中村俊輔，可以出任嘅位置包括有防守中場、右閘、中堅，最佳位置係防守中場，絕技係重砲遠射，2007年東亞盃外圍賽哥域馬尼試過40多碼起腳重炮破網技驚四座，雖則對手係冇歸化球員嘅關島。
據網上資料指，哥域馬尼曾經外流伊拉克，但多番查証後發現伊拉克所有聯賽從來都冇蒙古球員登陸過，原來只係哥域馬尼帶領蒙古少年球員南下中國參賽時被一名球探邀請去伊拉克試腳而已，最終件事當然不了了知啦。