現時舉行緊嘅2016 AFF U-19 Youth Championship（東南亞U-19青年足球錦標賽）已經進入半決賽階段，呢屆加入咗東南亞足協會嘅澳洲都有參加，只係唔見汶萊派隊。講起汶萊足球，佢哋曾經係東南亞足協會入面最唔積極嘅成員，唔係冇錢，主因過往汶萊足協內部有好多問題，甚至試過因為政府過分干預內務而被FIFA停權，不過足協運作正常化後近年都活躍咗，好多東南亞青年、少年足球錦標賽都見到汶萊派隊參賽，只可惜無論係大小國腳都係輸多贏少，好似前年東南亞足球錦標賽外圍賽咁，佢哋四場全敗，今年東南亞U-16青年足球錦標賽都係輸晒，可以肯定現時東南亞圍內足球實力最不濟嘅一定係汶萊。
當東帝汶係年初成立男子職業足球聯賽後，成個東南亞淨返汶萊係冇職業及半職業足球聯賽，但佢哋有一支由汶萊王儲Al-Muhtadee Billah（比拉王儲）做班主嘅男子職業足球隊叫DPMM FC（殿下皇冠），不過係參加緊新加坡職業足球聯賽而唔係參加汶萊本土嘅Brunei Super League（汶萊超級聯賽）。汶萊超級聯賽喺2012年成立，取代咗Brunei Premier League（汶萊專貴聯賽）成為汶萊頂級聯賽，而專貴聯賽就成為次級聯賽，成立汶超聯其中原因係為汶萊足球職業化作準備，雖然維基百科顯示汶超聯係一個職業足球聯賽，但睇完佢哋Facebook官方足球專頁介紹，實際業餘性質為主，由於係業餘，所以有一啲球員身型會比較肥大。
今季汶超聯有十支球隊參賽，包括Wijaya FC（勝利FC）、Royal Brunei Armed Forces Sports Council（汶萊皇家武裝部隊體育局）、Indera SC（恩特拉體育會）、Najip I-Team（拿積I隊）、Tabuan U21（汶萊U21）、Kasuka FC（卡斯加FC）、MS PDB、Kota Ranger（哥打流浪）、Jerudong FC（水晶FC）及Lun Bawang FC（弄巴灣FC），踢雙循環制，每隊都有主場，但離不開喺Padang dan Balapan Stadium、Kompleks Sukan Berakas、Kompleks Sukan Batu Apo及Penanjong Kem Military Base呢四個地方踢，四個場位處首都斯里巴卡旺市，同東帝汶超聯一樣都係主要集中喺一個城市比賽。
汶超聯同澳門甲組相似，部分球隊一樣有請外援幫手，而外援人數上汶超聯更係冇上限，上一個賽季咁就有八位職業外援登陸汶超聯，其中有兩名球員來自印尼，分別係效力水晶FC嘅中場球員Agus Haryono（哈利約奴）及效力勝利FC嘅前鋒Sigit Prasetia（佩鍚迪亞），印尼有網媒亦對此作出過報導，指呢兩位球員係因為印尼聯賽暫停而改去汶萊搵食，不過根據其他汶萊網站資料提及，佩鍚迪亞早喺2014年已經加入勝利FC，呢一年印尼足球環境唔算亂，而網上亦冇乜呢兩位印尼球員嘅資料，喺印尼踢過邊隊都係一個謎，究竟係去汶超聯做職業外援定還是去汶萊打工兼踢衛生波？真係可能永遠搵唔到答案。除咗呢兩位神祕印尼外援，其他國籍嘅外援球員身分都係一個謎，網上幾乎係冇佢哋任何資料。
即使汶萊蘊藏豐富石油及天然氣而名列東南亞最富裕國家之一，但國家有財富未必代表足運有救，汶萊國內經常都有球評人提出單靠一支DPMM FC係唔足夠，要將本土足球聯賽職業化先可以避免同東南亞各國距離愈拉愈遠，而足總及政府官員亦打算未來成立職業足球聯賽，但暫時只係得個講字，好多喺汶萊體育學校畢業嘅學生球員資質唔錯，就講2012年汶萊舉行嘅Hassanal Bolkiah盃，班汶萊U-21球員踢得有板有眼，唔會比緬甸、印尼球員差，呢班U-21球員都係產自當地體育學校，但畢業後只有少部分能夠加入DPMM FC成為職業足球員，其他只能留效本土業餘聯賽，唔少有潛質嘅球員踢踢下都會因為工作問題而放棄足球，簡直係浪費人才。
其實汶萊政府一向唔太注重體育發展，包括喺汶萊都幾受民眾歡迎嘅足球都係「一視同仁」，當地社會風氣只視足球為普通康樂活動，當認真考慮到發展職業足球聯賽，總會有專家彈出嚟提出好多原因指出汶萊難以發展足球，比如人口太少，但世界上有更多比汶萊環境更惡劣，人口更少嘅國家體育發展都比汶萊走得更前，證明好多難處都未必解決唔到，只係肯唔肯去做咁解，一支DPMM FC當然係唔足夠支撐成個汶萊足運發展，就算係唔可以短期內成立職業足球聯賽，都應該考慮先半職業化，雖然有職業足球聯賽唔代表足運即刻會有進步，但你唔想畀亞洲各國邊緣化，唔想繼續淪為東南亞足球魚腩，呢樣嘢你唔搞真係唔得。