中村祐人表示準備做香港人，呢個年頭歸化兵多，但日本球員歸化他國案例唔多，除咗中村，仲有松永祥兵，效力印尼豪門Persib Bandung嘅日本中場球員，喺印尼住咗6年，年頭表示有意歸化印尼，但印尼一方仲未有行動，究竟呢位球員會唔會成為印尼足球史上第一位日本土生土長嘅歸化球員，冇人知，但印尼有唔少本土新人幾矚目，好大機會冇咗件事。
不過松永祥兵已經成為日印友好嘅標誌，唔少日印友好活動，只要喺印尼搞，都會請松永祥兵去做友好大使，因為佢已經喺印尼有相當知名度，有時日本方面派代表去佢更會做埋翻譯，最近又有一個日印友好活動，松永祥兵又被獲邀出席。
雖然印尼話仲係講得唔好，但松永祥兵係印尼足壇史上首個可以用簡單印尼話與印尼球員溝通嘅日本球員，因此受到好多印尼球迷尊敬，即使語言天分唔好（好多來自非洲、南美及歐洲嘅球員去到印尼踢一年波印尼話已經好流利） ，但佢依然好努力咁學習及積極融入當地社會，呢種態度令人敬佩，連艾辛都對佢讚不絕口。
喺J2時期，松永祥兵機會唔多，知道自己能力有限好難攀上頂層，好快就選擇闖外，誤打誤撞去到印尼，結果踢到今日。