估唔連職場上施丹都可以完美嚟個「施丹轉身」，而呢個轉身都可以話係佢執教生涯最精彩嘅一次。
老實講，唔少人都覺得施丹走之前嘅皇馬已經係嗰代嘅黃金尾水，套陣容基本上開始老化，就算有班後生仔頂上都仲差一段距離，但買人用人話事權喺主席身上，買人用人又唔到你管，然後一個唔鍾意趕走你隊波嘅神射手，再死攬佢鍾意但你討厭嘅愛將，點搞？再講，皇馬要求一定比其他高，之前攞歐聯三連冠後高層實將要求再提高，再度衛冕不再話下，聯賽、盃賽冠軍更加走唔甩，拎第二？歐聯四強？Sorry，拖舟you are fire！
唔想畀人拒絕而受傷，最好方法就係先拒絕咗人，所以施丹喺高峰之際請辭，唔止冇破壞自己嘅金漆招牌，更加將所有茅頭射落主席身上，話佢迫走晒所有功臣。喺施丹開記招嗰陣，老人家望住施丹嘅眼神，空洞到好似失戀咁，眼裡幾乎發出「baby dont leave me~」嘅哀號，施丹呢招先發制人絕對係妙著！
辭職之後，施丹處於available狀態，以佢嗰陣嘅level，埋身嘅隊隊都係啲富豪強隊，不過施丹同球員年代踢法一樣，唔同你急睇定慢慢嚟，一陣唔覺意帶得唔好又搞臭自己個名就無謂，而家無官一身輕，笑看風雲。
但另一邊廂嘅皇馬就急到亂挑兵馬，為咗盧蛇而得罪埋西班牙足總。但睇住盧蛇帶住銀河艦隊好似Titanic咁撞冰山沉沒，國家打吡畀巴塞炒到稀巴爛，冇幾耐就畀人炒埋；接手嘅蘇拿利雖然有段小陽春，但聯賽接連失利，盃賽神早出局，連最後希望嘅歐聯都意外地緣盡十六強，再見都係遲早嘅事。
呢一刻施丹載譽歸來，就好似一隊處於下風嘅球隊突然殺出救兵，然後用一轉「施丹轉身」連過幾關，叫頹勢落後嘅球隊靈光一現。
一嚟，佢以救世主姿態重臨舊地拯救水深火熱嘅皇馬；
二嚟，有「話事權」去同主席傾，你想我返嚟就要畀我話事，從而增強自己過去一直都冇嘅勢力，不旦止清走佢眼中嘅瘀血，仲可以買自己想要嘅人；
三嚟，成班大帝都好聽施丹話，絕對有能力解決更衣室不和嘅問題；
而家皇馬盃賽神早出局，聯賽又唔使諗爭冠軍，馬體會、巴塞呢啲神早打曬，餘下嘅都係中下游份子，拎分估計唔太難，施丹大可以用呢半季時間摸索點樣重建呢隊波。球迷即使對施丹有期望都唔會望佢可以一下子就將堆爛攤子清除，就算下一季表現不如昔日自己掌教時咁出色，甚至冇埋阿朗呢面皇牌，但比起呢季嘅成績，都可以話係重建上面取得成功，因為已經冇嘢可以再差過今季。
呢次u turn，施丹成功令自己由無權變有實權，連主席都要畀面佢，無奈下放權力，（估計都要）賣走自己愛將。呢次一出一入喺各方面都合晒施丹嘅意願，可以堪稱足球史上其中一次精彩大反擊，甚至比幫皇馬三奪歐聯更加無懈可擊，好波好波。
*我都想睇施丹可唔可以救到冇C朗嘅皇馬
題為編輯所擬
足球說故事 Facebook Page