黎緊亞協盃16強會對傑志嘅萬隆隊，前鋒線上有一名身材唔高但奔跑速度幾高及腳下功夫幾好嘅球員，一名典型印尼前鋒，佢個名非常好記，叫做TanTan(丹丹)，一個浮沉於低組別聯賽己久直到近年至爆出黎嘅球員。
丹丹於印尼西爪哇倫邦市出生，2000年於半職球隊倫邦隊正式展開球員生涯，印尼足球名星Bambang Pamungkas(巴蒙卡斯)當年亦係一名年青球員，但丹丹命運卻與巴蒙卡斯差之千里，初出道時，丹丹連出場機會都冇，因為隊中比佢出眾嘅球員多的是。
2002年，丹丹終於有機會離開倫邦市，並獲萬隆市半職球隊Persikab Bandung(佩斯卡必萬隆隊)招攬，轉眼間效力7年，雖然並非長期正選，但憑良好技術及強勁之入球慾望，7年內為佩斯卡必萬隆隊攻下20多球，雖然7年計唔多，但以一個後備球員而言，每年都有一定產量算係唔錯。
由於丹丹一直效力次級聯賽，關注度不高，所以即使不停表現自己，結果都係WFC？邊個得閒埋？亦因次級聯賽球隊常有財政問題，丹丹試過N次被拖糧，但為咗做一個足球員，始終都唔肯放案夢想，其間做過唔少兼職維生，一邊兼職一邊踢波，終於一支頂級聯賽職業球隊Persitara Jakarta Utara(北雅加達)睇中佢，2009年正式簽約加盟，相隔9年至初嘗頂級聯賽滋味。
但係，丹丹並冇太多出場機會，因為北雅加達隊重用外援，但係喺激烈競爭下，佢成功於3個賽季中取得11個入球。可惜的是，北雅加達隊係頂級聯賽弱旅，又係關注度不高，丹丹在努力結果都係WFC？邊個得閒埋你？
但機會係留俾有準備嘅人，2011年非官方頂級聯賽Liga Primer Indonesia成立，新球隊Batavia Union(巴達維亞聯)正準備組軍，由於球隊希望尋找滄海遺珠，所以向兼職球員嘅丹丹埋手，並游說佢成為隊中職業球員，丹丹二話不說答應，結果丹丹成為球隊射手，但是，Liga Primer Indonesia半季就瓦解，好快，呢位巴達維亞聯射手又俾人遺忘咗。
之後巴達維亞聯與北雅加達隊合併參加次級聯賽，丹丹繼續跟隨球隊。由於次級聯賽電視直播可於免費頻道收睇，丹丹表現開始受人注目，終於喺2013年，印尼著名球隊斯里維加亞簽咗呢位30歲嘅滄海遺珠，起初冇乜人理會呢位前鋒，甚至有球迷不解斯里維加亞點解要簽呢位不知名前鋒？但當丹丹一上場後，所有球迷都好快記住佢個大名，因為呢位30歲不知名前鋒居然為球隊轟下9球並交出多個助攻，而且腳下功夫幾好，世人才後知：原來有呢個咁好波嘅球員存在緊。
一季後丹丹就轉投萬隆，喺31歲首次為國家隊上陣，國家隊主教練都話，呢位球員被發現得太遲了。印尼有好多好波之人，但唔係每個人都咁好彩，當然，如果丹丹當年冇堅持，今日萬隆隊都未必可站於亞洲賽場上。