曾經喺亞冠盃畀中日韓球隊大炒，降格踢亞協盃後成為東區勁旅嘅印尼巴布亞省首府查亞普拉足球隊佩斯普拉（Persipura Jayapura）今季繼續起用大量巴布亞本土球員，雖然冇用盡外援名額，但憑住球員嘅努力，去到印尼甲聯賽進入最後直路依然有機會爭冠軍，雖然呢個機會唔大，但亞軍都可以踢亞協盃，所以較早前球隊就向亞洲足協申請牌照，希望達到目的後可以重返亞洲賽。
但係近日球隊收到亞洲足協回覆，指申請不被批准，原因係交上去嘅文件資料都唔齊全，由於申請期已經截咗止，所以球隊將會錯過下年踢亞洲賽嘅機會。（如果拎到印甲冠亞軍的話）
呢個結果係好令人驚訝，因為佩斯普拉已經踢過幾次亞洲賽事，應該好熟悉亞洲足協有乜制度改變，盡備應該會比其他球隊多，另一支球隊萬隆申請係一take過搞掂，甚至從未踢過亞洲賽嘅峇里聯都過關，成件事都好匪夷所思。
球隊主席Benhur Tommy Mano對因為低級犯錯導致球隊未能通過申請而道歉，今晚印尼有媒體引述佢嘅道歉內容：「很顯然，我們很悲傷，但是這就是現實。作為一支大球會，我們必須接受這個現實。我們是順從和服從規則，即使我們也不想這樣的事情發生，但這是一個災難。
我們道歉，希望球迷和所有巴布亞人原諒我們，我們會解決這個問題，下賽季不會再發生。」
有印尼球迷喺社交網嘲諷印尼足球表面職業內裡仲係好業餘，今年有幾個知名球星去到印尼踢波，好多嘢都改變緊，比人感覺開始行返入正路，但內裡做嘢嘅人，根本未改變過態度。
今次事件可以反映一般印尼人平日做事態度，話我以偏概全都係咁話，是是旦旦又一日，呢種係佢哋嘅習性，即使球員天份幾好，遇著垃圾管理者，只會被毀滅前途，印尼足球要追上泰國睇怕有排，唔係喺東錦賽羸到泰國就以為同泰國有得揮嘅。
所以話，足球事，都可以望見當地社會環境嘅縮影。