首先利申先，有睇我之前嘅文（陳澤滔？呢度無人識你呀！）都知我不斷俾人鬧左膠，咁我都不能否認喺好大程度上都係膠嘅，但一句就抹殺哂我打咗咁耐嘅文就實在太悲哀啦。真心希望溫和派同勇武派花幾分鐘，聽一聽小弟所言。
有人亂叫「衝就係鬼」，又有人鍾意問批評者係咪熱狗。咁多人衝咁多人鬧你，邊得嚟咁多鬼。如果政府有能力滲咁多後生仔就唔洗搞到一鑊粥啦。搞群眾運動用呢種心態搞係咪會團結啲我無搞過真係唔識，但呢種唯我獨尊嘅心態係趕客就非常肯定。如果話共產黨滲入係為咗搞散我哋，咁呢種吓吓將不同聲音打去做共諜就正正中咗共產黨嘅詭計。你問邊個最開心？你亂咁問人邊個最開心邊個最開心？
不過大家唔好誤會我係支持退聯，對唔住我係反對嘅。但雙方都要以理服人。勇武派成日話傾傾傾好左膠，唔通邊個拳頭大先係文明嘅表現？傾唔掂要訴諸公投我明白，但連傾嘅過程都拒絕，任何改善改革都唔考慮，其實你哋個態度都唔好得過學聯幾多。
當然我明有啲組織係救返嚟都哂藥費嘅，好似亞視咁。但學聯係咪真係腐朽成咁呢，見仁見智。Anyway，我呢篇唔打算再講退聯啦。
我哋講勇武。
其實我係支持嘅（嗱，唔好再話我左膠啦，反面㗎）。但我唔係支持無止境嘅勇武，唔係支持亂丟一通亂燒一通，我支持嘅係兩個字 - 勇氣。有啲衝擊我自己都無膽做，所以我唔會走出話我支持你哋衝㗎但自己企係後面，但我深深敬佩敢衝同敢頂嘅人。
而我相信呢份勇氣係會感動更多嘅人。
當然你哋依然係會笑我左膠竟然仲講道德感召，但我真心相信嘅，因為我都係咁樣走過嚟嘅。2014年6月13日，東北發展立法會衝擊事件，我就係企喺立法會示威區後面，睇住前面啲後生仔衝。撞石牆暴唔暴力？拉鐵馬暴唔暴力？果日果個level 其實同爆玻璃果日差唔多，以泛民嘅標準應該就好暴力，但諷刺嘅係，我就係因為呢件事而下定決心走得更前。
因為，勇氣係人類最大美德。
因為，睇見年青人嘅付出同勇氣，我好慚愧。
道德感召唔一定要俾人拉要坐監，唔係嘅話只有監倉先可以有聖人。當然坐係度俾人拉係一種犧牲，係另一個層次嘅道德感召。但有勇氣去抗爭，有勇氣去挑戰高牆，有勇氣去冒被捕風險，其實已經有好強嘅號召力去鼓勵大家一齊出嚟抗爭。
睇到呢度高登仔一定又恥笑mode on，但我想講就係你哋勇武派啲淨係識鬧嘅文宣實在太趕客。泛民？鬧！
學民？鬧！
學聯？鬧！
港豬唔做嘢又鬧，肯付出去遊行捐錢都鬧，總知唔係一齊衝唔係去反蝗嘅無一幸免俾人鬧。
唔係話你鬧得唔啱，但鬧醒人呢啲咁戲劇性嘅情節只會喺TVB 嘅劇度出現。
你要多啲人信你果套，就請學習一吓左膠值得學習嘅地方。
唔好盲信咩咩贏咗啲人就會追隨你，我話俾你知，你講果班叫glory hunter。其實就算你贏咗，果班友都係唔會行出嚟。佢哋只會留係屋企坐享你抗爭嘅成果，或者會係電話訪問嘅時候話自己支持民主嘅，但抗爭方面佢哋唔會幫到手。而如果你要多啲人陪你出嚟癲出嚟衝，依然係要靠道德感召。
928，我哋唔會忘記一次又一次催淚彈，一次又一次退完又聚嘅場面。我哋唔會忘記即使傳出用槍，依然有一萬個唔怕死嘅兄弟死守金鐘嘅事實。
呢樣就係勇氣。呢個就係令大家甘心日日訓街嘅原因。
當然我唔覺得燒劉江華係勇氣，唔覺得企係人群後排掉水樽係勇氣。但我唔認同呢啲行為唔係因為暴力，而係因為我唔覺得做呢啲嘢結果會多咗人出嚟抗爭。當然你可以話掉水樽可以保護前面嘅人嘅，但首先你要瞄準啲囉。
而泛民同勇武派割蓆，最主要原因都係咁。佢哋唔係判斷打爛塊玻璃好暴力，而係佢哋覺得支持嘅話會少咗人出嚟抗爭。
而我想講，佢哋決定錯咗。唔係話判斷"少咗人出嚟抗爭"呢樣錯咗，而係決定割蓆呢個舉動錯咗。的而且確，果次嘅衝擊俾人感覺係好膠，一班後生仔俾個白痴理由均咗之後就係一個極不利嘅情況之下打爛咗塊玻璃，而鏡頭亦都影住班唔敢衝入去嘅朋友。
智慧又輸咗，勇氣又輸咗。
但割蓆，令大家唔再可以再走返埋一齊。
如果話勇武派搞散大家嘅團結，我諗泛民亦都難辭其咎。勇武派當要為佢哋派嘅膠負責，佢哋嘅衝擊間接搞散咗umbrella revolution，而割蓆呢？就搞散埋以後嘅群眾運動。
因為之後就係冤冤相報，互相指責，互相抹黑。
當然呢一刻講返都係哂氣，但我作為一個左膠，係度對其他嘅左膠作一個呼籲：
當我哋見到《查理周刊》俾穆斯林激進份子恐怖襲擊，依然希望大家反思穆斯林被歧視嘅問題；
當我哋見到叶路珊嘅超紅底，依然叫大家唔好用侮辱女性嘅字眼去攻擊佢；
當我哋見到慈母亂咁打人，依然努力咁嘗試拉攏淨返落嚟嘅黃絲警察；
當我哋見到香港俾大陸人佔領咁濟，依然希望對有生活困難嘅新移民伸出援手；
點解我哋唔可以用我哋嘅大愛，主動去同勇武派言歸於好呢？
如何你覺得勇武派係做錯，可唔可以諗吓其實佢哋都有佢哋嘅苦衷呢？俾政府呃咗咁多年，面對住呢個咁仆街嘅政府，咁無恥嘅689，最後仲要硬食個831決定，衝動咗少少其實唔係可以理解咩？
如果要大愛，如果要左膠，做盡啲，去到極致，我會反思埋勇武派勇武嘅原因。
我會選擇同佢哋企係同一陣線。
互相指責嘅時候完咗啦，係時候一齊面對共同敵人。
博奕論話俾我哋聽最好嘅策略係而眼還眼，但兩個而眼還眼策略互對嘅時候係有機會跌入冤冤相報嘅困局。
而解決辦法，就係隨機地伸出友誼之手。而我相信，依家就係時候去做呢件事。
而對勇武派，我只可以祈求你哋唔好再將泛民嘅所作所為當成全個溫和派陣營嘅取態。泛民係仆街，係出賣咗你哋，但唔代表所有唔支持衝擊嘅人都係敵人。如果你恥笑啲人逢親反對都問佢係咪熱狗，咁你都要思考一下係咪每個對你哋嘅行動同理論有疑問嘅人都係左膠。
我有一個理論，我認為政府有一個臨界點，果個臨界點叫警力。我假設有一百萬人用最溫和嘅遊行就會觸發個臨界點，政府就要屈服。同時，有一萬人勇武抗爭都可以觸發臨界點，關鍵係人數有幾多，同埋大家肯付出幾多。溫和嘅遊行，同最勇武嘅抗爭，兩樣嘢唔係各自分開，而係一齊計嘅。當你有五十萬人遊行，同埋五千人嘅勇爭，呢個臨界點同樣會觸發。所以唔好再鬧對方，因為兩邊都係為呢個臨界點提供貢獻。
而我哋要思考嘅係，如何同對方有共同行動，而又唔影響各自吸引支持者嘅辦法。
我相信好多人同我一樣，信唔過泛民，信唔過雙學，亦都信唔過熱血公民或者任何勇武派嘅領袖。所以我哋更加需要智慧去分析自己可以做嘅行動。而勇武派更加要智慧，因為勇武派係前線除咗面對政府機器，更加要提防真真正正嘅鬼。
當然你睇完最後都可以笑我天真笑我膠，我都認㗎。
但我相信大家需要嘅係胸襟。
天佑香港。
（最後，特別多謝喺屯門付出嘅咁多位勇武人士，真心respect）