攝：獨媒記者吳卓恆
編按：本文撰於10月3日，作者為一位當時在特首辦外當值的救護員。當日警方強烈譴責示威者阻救護車進入，然而身在現場的救護員指出，是警方多番拖延時間，阻礙救援。
【青年重奪未來影片】
小弟呢幾日都係中環同金鐘不同既自發急救站幫手，作為一個理應政治立場完全中立的 FIRST AIDER，唔好意思我以下講既未必做到你地所預期的中立，我文筆唔好，可能詞不達意，今次其實係我公開試後第一次寫文，但都希望用最簡單既文字將好多你地未必知道的事話告知大眾。
先好快咁講一講我泥幫手的原因，本來未能親身支持罷課的我在28號見證過不合理的鎮壓，睇住好多在場的人受傷，作為香港的一份子，我心好痛，只是因為我唔願意再睇到我的家人，香港人受傷，作為一個所謂知識分子、護士學生、去到最基本一個有同理心的人、我走出泥，希望為在場可能受傷的人出一分力，相信在場好多好多的 FIRST AIDER 都本住同我一樣的信念，去到呢度，你可能會話咁你政治立場呢？冇錯，我的確係有立場的，我支持公民提名，我希望爭取到真普選，就算我冇以 FIRST AIDER 既身份泥到呢個地方，作為普通的集會人士，你都一定會見到我。
咁我仲邊度立場中立？相信同好多作場的 FIRST AIDER 一樣，我地既信念係只要你有需要，我地就會幫手，不論受傷的係集會人士、黃色、藍色、警察、定係梁振英，我地一樣會救！
去到呢度，我要將可能大家唔係現場唔知的事實話俾大家知。10月3，係大約早上十點到十二點之間於特首辨有一架救護車同一架醫療輔助隊的車到左， SORRY 如果時間上面有少少唔夠準確請見諒，連夜留守實在令我心力交瘁唔太記得清楚時間，大家可以搵返呢單新聞出泥的。當時係紅綿道橋底留守的我聽到解放軍軍營鐵馬位置有人大叫 FIRST AIDER，FIRST AID STATION 內的人立刻跑到鐵馬了解情況。我地被警察告知有兩名伙記分別於辨內心臟病發以及扭傷，聽到心臟病發咁敏感的字我地當然好緊張，希望可以盡快提供協助，FIRST AIDER 們向鐵馬方向前進，但被警方告知唔希望任何醫護提供協助並表示只希望等候救護車到場醫療「病人」。
在場所有人都非常驚訝，「你地唔係有伙記心臟病發咩，點解唔放人泥幫手，人命泥架！」我手上冇好多既儀器，於是聯同幾名在場 FIRST AIDER 向其他 FIRST AID STATION 尋求協助，我向海富大站狂奔而另一醫護學生則尋找AED（自動體外心臟去顫器），我告知大站現場情況，但由於該站MO（MEDICAL OFFICER）表示不在範圍之內不會提供協助，因此我跟 PATROL TEAM 的 FIRST AIDER 重回鐵馬，與此同時，AED 亦已送到，在場FIRST AIDER再次向警方要求放同事入場提供治療，我地亦己重申FIRST AIDER們立場中立，入泥就係要救人，但警方堅持等候救護車，我地追問「在內有冇醫護，你地唔放我地入去唔緊要，我地拎埋 AED 過泥，唔該起碼點都會俾部機入去」，可惜對方依然堅拒並堅持要救護車經過佈防中最多障礙的路線進入，係呢個時候救護車已經兜左好耐終於經海皮方向泥到大樓後門位置，我地放低心頭大石，因為白車終於到。
但令人氣憤的事再發生，警方表示白車於該處仍未能進入，繼續堅持白車再駛入防線中以最複雜的路線進入（在此重申白車於海皮位置已經可以輕易進入大樓），我地不解，「你地唔係有伙記有事咩，點解咁都唔放白車入去」，都唔緊要，救人要緊，我地都管唔到今次你地係咪再一次咁想騙大眾藉此攻破我地防線或運入武器，我地唔理，我地推開所有經中環入金鐘的鐵馬水馬「求下你地，快D同白車講，我地已經開哂路，經大會堂方向，快D快D！」，點知對方再次拖延時間，警方告知白車再回頭經海皮方向往後門方向前進，「OK FINE，你地要玩野唔緊要，只要冇事就得，你地要點點點指示白車去，快D！」所有現場的人好緊張，好想白車快D到，除左警方，我地感受唔到佢地緊張感受唔到焦急。
呢個時候一個外籍警方白衣對住電視台攝影機拎起揚聲器：「入面有事既都係香港人，佢地有仔女屋企人，如果有事既話點算，係你地令到白車泥唔到架……」，對唔住我聽唔到落去，我憤怒我失望，現場人士：「原來搞咁多野你地咪又係想造新聞」，我地唔理唔到咁多，白車仲未到，我關心既只有在內警員的情況，白車終於到，係確認警員已上白車並駛走後，同我一齊既 FIRST AIDER 終於鬆一口氣，我地冇再同警方理論，既然白車已經到左就好了。事後兩小時我再往鐵馬向警方詢問究竟果位伙記仲有冇事，因為我地本來知道確認到既只有白車泥左同埋車左一個人走，究竟有幾嚴重咩都唔知。點知換來的答案只係「我地都唔知，我地都要靠睇新聞先知，上頭冇通知。」
哇！原來係咁架，原來係你地心目中，伙記兄弟係咁輕咁唔關自己事，追問下上頭有咩咁難？你地既守則有邊條係唔可以關心同事手足？點解一個連見都冇見過既人會比你地更緊張你地的伙記，我唔知。起碼，如果係我，我唔會理你咩規矩咩守則，上頭唔俾 FIRST AID 入泥，就我抬我兄弟出泥鐵馬等佢地救，唔俾得 FIRST AID 既，就我抬我兄弟出海皮等白車。喂大佬，人命呀，你仲想有咩藉口呀？每一次我地集會人士要打開鐵馬俾你地，你估我地唔驚你信我地唔怕，如果因為我地開左路而令後面以為仲安全的集會人士受傷，我地唔驚？我同你講，我地係好L驚，呢個責任我地揹唔起，但點解到最後都開哂路？因為我地緊張你地咋，我地深信就算而家大家可能立場唔同，我地都係一家人（起碼我仲希望過）。但換泥架係咩？又係你地一次又一次的背叛，我勀啦，我真係勀啦。我冇諗過有一日我會打從心底裡面希望你地警方係呃緊我地，等白車泥既時間過得好慢，睇住白車因為你地所謂既要求愈駛愈遠，我好痛好擔心，我好想好想你地講既係大話，好想入面其實冇人真係等緊白車，好想白車入面既都係你地D所謂既野食，好想到最後真係冇人有事。好矛盾，我忍唔住，我廢柴，我冇用，我再一次係金鐘呢個我咁大個仔都冇泥過既地方喊，同我一齊擔心緊的 FIRST AIDER 都忍唔到落淚，我唔敢講我地係為邊一下而喊，我唔知……
TO 所謂既高層既你：如果你地既伙記果時係真係有事既話，請你地好好咁反省下你地做緊咩，你地想同我地玩手段，唔緊要，唔該唔好再用人命，唔好用自己手足泥教非
如果你地既伙記果時係冇事既，恭喜哂，因為你地又造到新聞又冇人有事，但記住一次不忠百次不用，更何況我地已經一次又一次咁原諒你地同相信你地，可能你地唔信狼來了，但當真係有狼既時候，唔好怪我地，我地已經好勀好勀，未必可以再承受多一次既背叛，到時可能真係會再冇彎轉。
TO 將會掌權既同埋掌緊權而且仲有良知既你:我知係一個無理的請求，唔好再俾咁既事發生啦，可能下屬只係棋子，但既然佢地將自己交左俾你地，你地就要對佢地負責，唔好做一個令你以後面對唔到佢地面對唔到我地既決定！
我只係一個好普通好無力既護士學生，做唔到太多，但都希望呢小小既心聲可以去到你地既心入面。