首先我必須講，二百萬人出黎，我地乜野都無爭取到架（而家既「階段性勝利」就是「暫緩」同「道歉」），唔好再自High啦！
或許很多人覺得，二百萬人出黎行你都唔理，無架啦，香港死架啦。我想同大家講一樣野：我地唔是End Game，而是Infinity War。我地面對的敵人，就好似Thanos咁癡線，打極都唔會死，而我地要明白一點，只要你深信呢個唔係End Game，而是Infinity War的長久戰（其實一直打緊）！
佔領非長久之法
所謂「兵貴神速」，拖延戰絕對不利，在雨傘時已完全證實這一點。香港人，你終於知道咩叫「香港人，根本就唔係你當家作主」呢個殘酷的事實未？大家都無可能同可以輪更的警察打消耗戰，更何況佢地裝備是L1000而我地是L1。趁現時警察非武力清場，學鄘神話齋，不流血不受傷不被捕是重點，而家全身而退好過又同佢硬踫硬。
至於遊行，係咪要再星期日日日遊街？經過呢兩星期，我希望大家明白，遊行呢個方法起相對民主既社會是絕對有效，佢可以Raise國際關注，俾政府壓力；但是，大家都明，我地已經是在一個極權國家，林鄭理得你死人（真是死左人），佢都唔會跪低。所以，唔好再沉迷在「嘩我地有4份1人口上街呀！」呢種虛妄裡面。同樣地，我地谷得起一次半次呢個人數，又係咪可以個個星期日有呢個人數？大家都知呢個機會微乎其微，然後又俾建制有位入「民意消退」，咁真是有用？！
所以，不合作運動（例：搞下港鐵）果D 是OK的、打游擊是OK的，點做可再從長計議，但反正佔領就是唔Work—當然，佢有振奮士氣之效，但佔完好立刻散水，畢竟就如剛才所言，消耗戰對我方絕對不利！
要有「策略」地計劃以後的抗爭形式
遊行／佔領／甚至暴力衝擊都無效，仲可以點？所謂「知己知彼，百戰不貽；不知彼而知己，一勝一負；不知彼不知己，每戰必貽」，我們要對付既，除左遠在天邊的中共外，真正要通過呢條條例既，是果班建制，因為佢地先是真正通過條制的真正傀儡！
然後要知呢班建制驚乜，佢地最驚就是無左議席、連唔到任、無左利益、無左外國國藉（你諗下陳健波個9樣）。連登仔已有行動，例如要求凍結班建制的外國資產等，個人認為呢制直接制裁到呢班人的方法先有用（當然包括林鄭）。另外，用盡所有方法，唔好再俾佢地箍到D老人票，一定要將佢地趕出立會！
成日話特首下台，然後呢？
我知大家今次，都聚焦左起林鄭身上，當然一個廢既傀儡（e.g. 董建華）同一個癲左既傀儡（e.g. 林鄭）出黎的效果是有分別，但由頭到尾都是一個傀儡呀！控制傀儡的，終究是不忠不義的中共政權。咁大家就認真諗諗，佢會唔會俾一個「唔係傀儡」既特首出現？唔會。既然係咁，下一步是咩，我就唔講落去啦，大家自己諗諗啦。
我們都是英雄
時至今日，可能大部分人都仲抱有一個期望，以為會有個超級英雄走出黎領導大眾、拯救世界。今次吸取左雨傘教訓，我地唔再相信大台，但我明白，大家仍然好想有精神領袖，給予方向同支持—但我想講，我地都可以是英雄，我地唔需要大台、唔需要精神領袖，我地需要的是我地堅毅的心，去應付呢場Infinity War！
也許我們只有一個機會
奇異博士數盡千億萬個機會都係輸，只有一個機會，但仍不會因此放棄！二百萬人的上街（雖是無用），至少表明左我地的決心！
記住，抗共之戰從來不是End Game，而是Infinity War！
（作者按：因為本人還是稿件能刊出的關係，這是「乾淨版」文；如果想看「不乾淨版」，可至本人專頁查閱。）