事先聲明：各位居住在道德喜馬拉雅山的道德偉，請你直接跳過這篇文章。雖然本文只是將後現代人口結構失衡的問題，結合當前的政治狀況一起討論，不過其中支節可能會引起你情緒不安。You’ve been warned.
有睇過葉朗程《官燕》一文，應該都知道手機應用程式Tinder。未聽過？唔緊要，以下是葉朗程對這個app的描述：「玩Tinder，首先要設定「對象」的目標範圍，例如性別和年齡，然後就輸入你想搜尋的目標「距離」，即是在你方圓幾多里之內，跟住你就可看見一個又一個「符合要求」的對象。最欣賞呢個app嘅地方，係個interface做得好正，一張相一個畫面，簡潔整齊，而每張相下面就有一個「心心」同「交叉」。按「心心」代表你有意思，「交叉」即係叫人早唞。無論你「心心」定「交叉」，對方也不會知情。如果你「心心」佢，但佢「交叉」你，雙方是永遠沒有機會交流的。換句話說，一旦你心心佢而佢又心心你，即是心心相印，關係就會揭開序幕。」
睇完之後，相信大家都會明白一件事，就是Tinder是一個認識異性朋友的app。有人叫它做「約炮神器」，我諗係大家諗多咗。我有一位女性朋友，佢玩咗Tinder一個星期，已經「認識」了300多位新朋友。喺網絡世界，呢啲位永遠都係男多女少。可能Tinder真係約炮神器，不過肯定唔係講緊男性。
入正題。實不相瞞，我有玩Tinder。我玩Tinder，純粹係因為我想知道時下美圖秀秀的功力，係有幾咁進步，同證明自己半遮面的自拍照，有幾大吸引力。OK，我知你唔會信，不過呢個係我的officical answer，你叫我recap 一次 in English都係咁話。
雖然半年前我已經開始玩，不過最近一個月，Tinder發生了一個怪現象：就是我見到本來應該是顯示各美女頭像的位置，大部分都變成黃絲帶。我明白，因為她們Faebook的頭像換成了黃絲帶，所以她們Tinder的頭像，都換成了黃絲帶。不過奇怪的是，雖然我在Tinder閱女無數，不過我一次藍絲帶都未見過，所以我只能假定一件事：李偲嫣應該沒有玩Tinder。
本來我玩Tinder，就是為了睇女，不過而家全部變成黃絲帶，你都咪話唔傷心。我screen cap咗其中一位黃絲帶小姐，然後放上Facebook，caption寫：「只轉不評」。三分鐘後，舊同事Stanley留言：「This is the only sexy thing in town now.」You are so damn right Stanley.
走筆至此，相信有讀者會跟我說：「大家無謂再呃自己話出面一切係正常，我諗，大家係時候停一停，面對我哋見到嘅現實。」尤其是金鐘、旺角、銅鑼灣仍然風頭火勢。不過我只係想喺今個萬聖節，喺無黃、藍絲帶的打擾下，好好enjoy一個Halloween Party。