圖一 天馬苑。前景便是平台花園枯槁的樹。
天馬苑自救系列（一）
一代名苑，花果飄零
領展變賣商場，居民無所適從，自己屋企自己救
＊ ＊ ＊
圖二 天馬苑商場的揭幕標誌。
1987 年天馬苑落成，由房屋司主持揭幕，花圃樹立飛馬雕像，神氣非常。但自政府私有化商場，屋苑從此分割，居民對領匯展所為無從置喙。及後匯展更棄如敝屣，新財團無心經營，一代中產為之嚮往的居屋，竟至凋零。
唯有生於斯長於斯，才能把情感化為力量。
＊ ＊ ＊
阮太太（居民）
自商場易手，新財團大加管理費，迫走小商戶。阮太太說：「依度幾唔就腳，冇理由買個麵包都去老遠架嘛。唔係每個居民都想幫襯超市。」
而且加費換來更差服務。領展撤走後，管理員比以往更少，幾個月都未有新垃圾桶，「廁所冇乜清潔，衛生環境極差」。平台花園乏人照料，植物逐一枯萎。
居民自發成立「淋水小組」，「啲花花草草已經陪左大家幾十年，公公婆婆唔忍心，自發淋水，我地都有幫手。但搬唔到幾多水，救唔到幾多。」
「易手不過九個月，已經變成死城咁。」
＊ ＊ ＊
陳太太（居民）
陳太太是第一代業主，甫落成便入伙，至今三十年。
領展翻新了附近的樂富街市。陳太太說：「不知所謂，都未見過街市咁樣嘅。裝修得靚冇用，至緊要係街坊生意。猛咁加租，商戶逐一做唔住。」
但天馬苑商場更是人去樓空，「買餸一係去樂富，一係去竹園。」
「你都要為居民設想，得番一間藥房，一間藥材舖，一間麵包舖，都要趕走佢。本來仲有間診所，但已經冇左，等唔切去邊？」
「每年三月木棉花開嘅時候，龍友都會嚟影相。我有鍾意影相嘅朋友，嚟到先知出事。」
「街坊都係自發出嚟，自己搵立法會議員幫手。我地求救過呢區嘅區議員，但佢乜嘢都唔理，剩係識畀老人家著數－－啲老人家又鍾意著數。呢個禮拜佢先嚟抽水，派傳單話做乜做乜，跟住又會貼通告話幫左我地。」
「政府賣左商場，亦將我地賣左出去。我睇住自己屋苑本來好靚，竟然搞到咁。我不嬲唔多理嘢，但真係火滾。」
「既然人地幫唔到我地，咪自己屋企自己救囉。」
＊ ＊ ＊
劉太太（居民）
劉母帶著兒女在公園玩耍。孩子本在樓下補習，但現在不知再往何處。她說商場本就偏僻，理應服務屋苑居民，背道而馳的結果，只是更加冷清。
必須一讚圖右男孩（圖三），儘管母親已允許拍照，但男孩仍然很認真地問筆者「乜水」，懂得保護自己和妹妹。
＊ ＊ ＊
張女士（商戶）
張女士是商場的藥房店主，五月底約滿離場。她說新財團大加租金和管理費，租金加幅超過一成；管理費則由每呎 $4.5 大增至 $6.5。連卸貨亦另設收費。
租約將屆，不但新財團無意續約，藥房亦無意留下。她說管理費只是問題之一，管理質素更難以忍受。
＊ ＊ ＊
鄧女士、李先生（居民，救救天馬苑大聯盟成員）
鄧女士入住天馬苑七年，但到最近東窗事發，才明白政府變賣資產的光怪陸離。
居屋由房委會管理，本來正常不過。但當商場及停車場私有化為領匯（領展），居民不知部分地段已一併轉讓。
「我一直以為有交管理費，包埋平台花園，冇諗過原來屬新業主。居民好自然咁投訴業主立案法團，點解唔做嘢？」
圖四 由私有化到變賣，業權分割，衍生種種光怪陸離。屋苑一邊的樹木綠意盈然，不過一路之隔，就是一棵棵枯萎的樹。
但業主立案法團無權去管。結果衍生古怪的現象，屋苑一邊綠意盈然，一邊槁木枯黃。
「我到今日都唔清楚，究竟邊度屬於屋苑，邊度屬於新財團，靠啲樹木綠唔綠去估。」
當居民告急，傳媒跟進，財團終有答覆，謂平台花園滲水，所以才疏於澆水。
鄧女士說：「商場水池本來有龜有魚，而家乾左兼消失哂。佢地話收起左！好容易搵到破綻＊。」
圖五 天馬苑商場內的植物，同樣乏人照料而死。
圖六 天馬苑商場內的植物，同樣乏人照料而死。
另一居民李先生直斥是藉口：「商場裡面啲植物咪一樣枯死，我信你都覺得自己傻傻地。」
（＊註：市民已查詢漁護署，證實未收過天馬苑的龜，去向仍然是謎。）
＊ ＊ ＊
Simon（居民，車主會成員）
Simon 也是天馬苑第一代居民。正是他聯絡朋友，拍下「救救天馬苑」的宣傳片。
新財團自領展手中，買下商場和停車場。交接之際一度沒人接手，釀成混亂，遲來的人又沒證明，車主要報警求助。
新財團推行新政，要求車主重新登記，卻沒有「固定車位」的選項。
「領展往往將出面嘅停車場轉做浮動車位。俾更多時租車入嚟，收入會更多，但都係旺嘅地方。呢度車位好充足，固定車位執行左幾十年，領展都沿用。」
圖八 天馬苑居民在大廈大堂，貼出前後對比照申訴。
長租的車主本來都有固定車位。改弦易轍，其實是為了慳錢。
「固定車位要對號入座，管理員要做更多功夫，分配車位，檢查車位有冇泊錯。浮動就可以亂泊，每更只要一個管理員把關。」
Simon 批評新財團曾眾目睽睽，承諾公眾諮詢，及後卻沒影沒蹤，更自行拆去「固定車位」的辨識。超過八成車主合組車主會，自行維繫固定車位的秩序。
他亦不約而同提到當地區議員。「點解要自救？搵唔到人幫手。我地唔想要公式化嘅回應，亦唔想任何區議員抽水。整整一年，我地唔覺得當地區議員幫到我地手，唯有自救。」
圖九 天馬苑商場內的電梯長期固障失修，直到居民集會前一日，才有人圍封電梯。
「你話領展差？差處未算差。我地唔係唯一嘅受害者，有 29 個屋苑商場已經被領展賣走。希望林鄭正視問題，大家繼續跟進。」