繼旺角被清埸後，金鐘亦不能倖免，我地依家可以做啲咩？只係等待執達吏同警方執行禁制令繼而清埸？
朋友們，以往你地仲記唔記得當聽到「清埸」時侯，你地嘅反應係點？你地唔係好激心咩？你地唔係好氣憤咩？唔理「清埸」係真定係假都好，你地都會出去留守，守住佔領區，因為佔領區係我地當日捱住摧淚彈之下守返嚟。
一直以嚟，反高鐵、撤回遞補機制方案、亞運超支、委派林瑞麟出任政務司司長，特首官員議員僭建、小圈子特首選舉、反國教、反東北發展、雙非孕婦來港產子、搶奶粉、搶學位、水貨客充斥、貪曾貪污、陳茂波利益輸送、香港電視發牌失敗、港鐵「有加無減」機制、李旺陽「被自殺」、租金昂貴、小商戶被消失、金鋪當道......
每個社會議題我地都激烈討論過，亦上街遊行示威向無能政府表達我地訴求，但有用咩？當日我地不斷叫人「七一」上街，但之後點？一次又一次失望，政府一次又一次無視我地訴求，呢種硬生生比人「屈機」嘅感覺真係好難受，面對呢個政府，我地真係感到無力。
大家遊行初衷係表達訴求，希望政府聆聽訴求繼而行動，但事後卻變成遊行人數上嘅爭論，最後一句：「政府可恥！警察可恥！」就完結了，早訓早起身繼續返工返學，社會又回復一片寂靜。 但我地得到啲咩？真係純粹表達訴求？定係對住遊行人數打哂飛機？最後我地都變成沉默嘅一群，嘲笑一班仍然覺得上街示威遊行仲有用嘅人，笑佢地除咗叫口號，叫警方開路之外，佢地遊行同公益金百萬行有咩分別？
對政府死心，坦然接受被屈機嘅現實。直至普選方案，雙學罷課，我地雖然留意住新聞，但口裡仍然覺得咁做係「哂氣」。926，衝擊公民廣埸，令我地一班已絕望嘅人燃點返希望，眼前一班學生被警方暴力對待，即使當晚係我生日，仍然同一班朋友出去包圍政總，「撐學生!釋放學生！」成為當晚叫得最多嘅口號。
928早上，同班朋友一聲不響地離開，眼前有個學生喺天橋大叫：「求下你地唔好走呀!求下你地呀！」我同朋友們互望後，靜靜地喺佢身邊走過，嗰刻好想同佢講:「放棄喇。」
928晚上，即使第二日係星期一，仍然有人捱住摧淚彈繼續留守，亦因此遍地開花，旺角及銅鑼彎先後出現佔領區，眼見「雨傘運動」打破以往抗爭方式，加上十萬人逼爆金鐘，我自豪咁同身邊朋友講：「香港已經唔同咗了，人民終於醒覺。」
往後學聯發出升級聲明，最後「走數」，繼而往後有行動都被標籤為「暴力」，甚至話要比臉「共產黨」之說，和平理性非暴力再次出現。運動開始慢慢膠著，如果唔係大大小小黑警暴力事件，旺角黑夜，藍絲衝擊，呢埸運動一早已經完咗。
膠著期間慢慢演變成「內鬥」，左膠前左膠後，勇武前勇武後，衝就係鬼，我親眼睇住警察正衝擊防線時侯，前排班示威者係到互屌緊大家，金鐘「大台」事件，血洗龍和道，退埸與否......大大小小我都唔講了，因為講咗咁耐，有咩野係關真普選事？勿忘初衷呀！
雖然928有好多人都係為摧淚彈而嚟，但往後逼爆金鐘時侯，嗰十萬人去咗邊？真係為咗趁熱鬧? 嚟打卡？定係已經死心？我真係諗唔明。香港人係善忘，但無理由去到咁嘅地步，大家開始對運動冷淡，身邊朋友都唔再討論呢埸運動，Facebook大部份都係討論黑警打人，我想講......警察從來唔係我地目標，就算「鳩嗚」我都唔覺得對於真普選有咩幫助，大家似乎想向警察報復多......（雖然我都成日落去鳩嗚。）
身邊已經無咩人再討論了，即使清埸在即，大家都淡然接受，當日激動嘅佢地已經成為歷史。
呢刻，聽住「撐起雨傘」，睇住個MV，內心很心酸。
有人話呢埸運動嬴咗好多，我想講呢返說話嘅人收聲......究竟羸咗啲咩？
人民覺醒？係！我認同！人民終於覺醒，終於覺醒呢個政府係屈機，終於覺醒香港人只係......唉
社會繼續分裂，支持佔領同反佔領人士繼續 Unfriend，有人話立法會將會票債票償，但真係咁認為？真係覺得立法會建制輸哂？
最後，曾經留守人士，曾經支持真普選人士，曾經為運動出番力嘅人，問問自己，甘心咩？亦問問自己，熱情有冇淡化到？金鐘人數已經慢慢小得可憐......其他人究竟諗緊咩？問一問自己.....你地初衷係咩？
有人話今埸失敗係勝利開始，真係咩？連佔領都無用，往後遊行示威仲有用咩？
就正如我好想阿媽買部電腦比我，我努力讀書入到大學，阿媽都無動於衷。往後唔通我期望校內默書考到100分可以令到阿媽買部電腦比我？
唉，其實都唔知自己講緊咩，只係聽到清埸，我個心就好亂，硬生生睇住被收皮而無能為力嘅感覺真係好難受。
圖中個女仔係我好朋友，現在只剩低佢一個肯聽我呻下政治，聽我9UP，因為身邊已經無咩人再肯同我瘋狂積極討論。
有句歌詞令我有好大感受。
若是人生 錯過這一晚
怕再沒機會任意呼喊
我真係咁認為......好唔甘心。