網台真係一個激屌的空間，因為唔夠激會俾人屌。最近就上演了一幕前八十後激進青年陳景輝，先俾老闆大班屌完，無辦法之下辭職，再俾對台黃洋達屌... ... 然後... ... 皇上宣告停咗人網嘅「早朝天下」，同日有人見到大班同皇上一齊撐枱腳。
八方嘗試重組陳輝被屌的案情，事件起因：大班嫌陳輝《八十後》節目對「網絡廿三條」，即「2011版權（修訂）條例」嘅立場唔夠激，認為佢地要鬧爆何秀蘭對條例小修小補嘅態度，結果，唔顧老闆嘅身份 phone in 大鬧幾個主持人一餐，陳輝即時嘅反應係覺得寃枉，佢地之前幾集都有鬧爆條法例，只係嗰集想搵何秀蘭講下立法會嘅討論；嘉賓主持張嘉雯即時鬧大班干預咗節目主持人處理節目嘅方法，之後仲係面書出咗封公開信：
傳媒是社會公器，聽眾打開收音機不是要聽老闆如何指點各位主持。每個節目都有自己的風格，炮轟的方式或許適用於你，但不一定適用於我們。如果鄭先生你對節目內容有任何意見，大可以向監製說明，我們亦樂意聆聽，這種粗暴phone-in，赤裸裸干預節目自主的方式，的確令我大開眼界。
據我們理解，鄭先生已經並非第一次以聽眾身份Phone-in，向其他節目主持人施壓，只是大家一直以來忍氣吞聲。你知道嗎？「八十後」這個詞語的出現，是因為社會上有五十後、六十後和七十後，他們有牢固的社會地位，以及一直賴以生存的生活方式，八十後的出現，讓他們不耐煩、不安全、不理解，結果創造了「八十後」這個詞語，把我們置於放大鏡下研究。
對了，我正正是想告訴你，我們就是你永遠無法理解的一群，就是不會因為你的威嚇、為了你所賜予的飯碗而噤聲的一群。鄭先生，我感謝你曾經看得起八十後，邀請我們這群寂寂無聞的小薯仔來開拓年輕聽眾群。有一句話是這樣的，「愈是討厭某類人，自己愈會變成這類人的模樣」，重看壓史，如果當年鄭先生你感到很大壓力而要封咪，今時今日你已經青出於藍了，因為你看不到別人，你只看到自己，你以為自己擁有真理。
大班作為老闆，好明顯唔係一般嘅 phone-in，若果港台台長或管理人打電話公開咁鬧主持人的手法有問題，我估成個香港都會炮轟佢，當然，善良咁去諗，大班係恨鐵不成鋼，但媒體老闆唔可以咁管員工。不過，八方又唔係數碼台粉絲，又唔知裡面嘅管理係點，本來對呢件事無咩興趣，照舊食花生。
令八方諗唔通嘅係，點解人網黃洋達咁肉緊呢？由大班開台起，人網成日同對台隔空開火，呢單野，如果由兩台競爭嘅角度，應該食住花生睇數碼台內閧，但皇上好明顯企咗喺大班一邊，勁屌張嘉雯，話佢上綱上線屈大班干預，攞住「八十後」招搖撞騙。又勁屌陳輝未老先衰，陳鑑林化，好似佢地兩個係自己殺父仇人咁。究竟發生咩事呢？
更離奇嘅係，皇上４月２４日修理完對台嘅「八十後」，兩日後即宣佈離開人網：『早朝天下』宣佈結束，明天，2012年4月27日，將會是最後一集。
皇上的粉絲好失望，係面書估佢離開嘅理由，Jason Lee 綜合咗幾個理由：
黄洋達唔做早朝天下，有說係為左入冊坐監三星期之後準備九月選立法會，又有說係為左黄洋達同人網管理層反面，眾說紛紜。
此時，八方嘅耳目傳來了皇上同大班昨午撐台腳嘅消息，呢個又會唔會係佢離開嘅另一個可能嘅理由呢？如果皇上過檔，大家對之前激屌「八十後」嘅節目，又會唔會有新嘅解讀呢？網台激屌主義會有咩新的實踐上嘅飛躍呢？大家真係要拭目以待。