「農夫啲歌！？ 垃圾！ 都唔知唱緊咩！」
「除咗唱得快，比較押韻之外，佢地嘅歌仲有咩特別？」
以上係我讀中學時候對農夫啲歌嘅評價，嗰陣真係完全唔知佢地唱緊咩！嗰陣高登成日都反佢地，又MK又以為自己好好笑，我雖然對佢地唔係反感，但至少無咩特別好感。
所以一直以來我聽歌風格都係「開心聽陳奕迅，唔開心聽陳奕迅」，所以我部ipod Touch幾乎好多歌都係陳奕迅嘅歌。但前排我發現，原來農夫啲歌都幾岩我聽，不但聽到令我有好大感觸，甚至有一種心酸唏噓感覺。
但最神奇嘅係，呢啲歌我好早以前已經聽過，但點解當時我無呢種感覺呢？無呢家對佢地咁高評價呢？
思前想後，原來我以前根本唔明佢地啲歌想表達啲咩，但到呢一刻，已經廿幾歲，踏出社會做野都已經一年半，我開始明佢地唱緊咩，同埋最重要嘅係，我係對佢地嘅歌有「共嗚」。
我對農夫嘅歌唔係話識哂，我自己都係喺Youtube聽佢地嘅歌先識。有幾首歌想特別講下，你當係推介又好，咩都好，我就係想講。
我自己最鐘意就係「十七年華」，當初睇到呢個歌名，就估佢應該講緊17歲嗰啲咩人生體會等等！但我一聽落去，原來諷刺緊時下報紙報導亂咁報導，經常作故仔咁作，歪曲事實，唔講以為個記者係當事人。加上「十七年華」講緊個老豆性侵個女，其實我知道呢種事係香港係經常發生而且係無人知，至少識得有人係咁。但呢啲新聞往往只係關注幾日就無左回事，究竟呢個現象係香港人三分鐘熱度定係事不關已，已不勞心呢？
第二天沒人理會這新聞
第三天沒人理會這新聞
第四天沒人理會這新聞
第五天同類事件再發生
第六天人人關注那新聞
第七天沒人理會那新聞
第八天沒人理會那新聞
第九天沒人理會那新聞
第二首係「重新找到你」呢首歌我每日返工都會聽，亦覺得呢首歌嘅曲風都唔係好似農夫唱嘅風格，但聽落又有另一種感覺。首歌係講緊當我地踏出社會做野之後，每一日所發生嘅事好似「影印」咁，返工放工返工，慢慢忘記「真正嘅自己」，對於咁嘅你，你甘唔甘心？係唔係應該作出改變，重新搵返自己？
同一個鐘數又上班
同一套西裝與襯衫
同一個熟悉車廂搭客也是同一班
同一個早餐與晚餐
同一串工作與帳單
同一個電話響起借貸有利息減
早半生已充滿遺憾天天仿佛影印
如今過了大半生
原來從來你也不甘心
第三首係「偉大航道」，呢首歌一開始已經講咗我呢篇想講嘅野
『呢首歌係我特別為你而寫嘅
可能你而家唔知我講緊咩嘅
但係到你大個拿返呢只歌喺CD機度播
你會知道我為你做左啲咩野』
呢首歌好似有人經歷好多事情嘅人，同後輩分享同勸勉，希望聽嘅人唔好「行差踏錯」。有時候聽到或者自己成日呻「考試好難，功課好多，老師好煩」，但出嚟之後，「原來做功課好簡單，做人好難」。愛情首歌都有講到「愛情係好玩但係唔好玩愛情」，「唔好隨便同人發生關係，話就話前事不提，都係另一種虛偽。因為我始終認為，你老公都唔想知道佢有咁多襟兄弟」。我諗都幾咁Sad but true。
「24」呢首歌個編曲好正，講緊「如果人生係得番24小時 你會有啲乜野表示」，我地人生所需要經歷嘅嘢係咪整定？係咪個個都一樣？我地夢想係咩？ 聽完呢首歌之後，真係反思過自己到死個日，會唔會後悔自己好多野無做，後悔自己虛耗光陰。
「唉 由細開始要勤力啲 考好啲試
我聽過唔只一次 全部人都口供 一致
話我知 入得到大學拎到張沙紙
入間大公司攞到啲銀紙 先可以 先可以叫做成功人仕
係邊個話我知要咁樣做人 先至算係有意義
一出細開始呢一個標準就係最高既指示
每個人都只係棋盤入面一隻棋子」
我覺得香港唔知幾時開始少咗好多比較勵志嘅歌，而多咗好多商業/情情塔塔嘅K歌，而農夫嘅好反映香港人嘅社會人生百態，好有「本土味道」，特別佢首「奧運會」，以香港百態比喻奧運項目。
其實每次講到歌手又好，歌曲又好，總有人鐘意亦有人唔鐘意。而我覺得自己鐘意咪得，難得有人寫下攪笑嘅歌，輕輕鬆鬆笑下過癮，又有意義又有共嗚，其實唔好咩？
學生聽「學海無涯」見到當中歌詞會覺得好抵死會回心笑出嚟。「雙囍臨門」好似聽緊故仔咁。講淫歌又有「最緊要扯旗」。「全民皆估」嘲諷時事等等....講到呢度都夠，其實仲有好多歌值得聽嘅，例如「粒粒皆辛苦」嗰啲。
可能我理解歌詞同大家有出入，但唔緊要。聽歌呢啲真係好主觀，我寫呢篇只係想分享下我對佢地嘅感覺，亦感謝佢地為香港人寫咗呢啲歌。至少我感動過，反思過。
大家仲有冇推介？
BTW: 我呢排同班FD 狂係Whatsapp group 瘋狂唱佢地啲歌，笑死我。
P.S 當我搵緊佢地張圖時候，點解要貼呢張？因為我以前見到呢兩條友咁MK，點會諗到佢地會寫到呢啲歌呢！？